Mittarfinnik talliliinissaq qanilliallattoq

- Aningaasalersornissaa unammillerfiussaaq. Tassa aningaasalersuineq isertitallu ataqatigiissaarnissaat akiligassagut akilersorsinnaaniassagatsigit. Sanaartornissamut taarsigassarsiniartussaavugut, Piginneqatigiiffiup siulittaasuatut toqqagaaqqammersoq Leo Larsen oqarpoq.

Piginneqatigiiffik Naalakkersuisunit pilersinneqarlunilu pigineqartoq Qaqortumi mittarfiliorlunilu Ilulissani Nuummilu mittarfinnik talliliissaaq.

Aamma atuaruk Ingerlatseqatigiiffiit nunani allamiut pingasut mittarfiliornissamut aningaasaleerusuttut

Tamannali qanoq aningaasalersorneqassanersoq oqaatigissallugu siusippallaarpoq, periarfissalli arlaliupput. 

- Taarsigassarsiniartarfiit periarfissaapput, aammali pisortat namminersortullu peqatigiinnerisigut namminersortunit  aningaasaliiffigineqarnissaq periarfissaavoq, kisianni tamanna suli aalajangiutinngilarput, Leo Larsen oqarpoq.

Kalaallit Airportsip mittarfinnut pingasunut isumaginnittussatut politikkikkut aalajangiuffigineqareerput. Imaanngilarli suliat naammassineqassasut.

Aamma atuaruk Mittarfilioqatigiittussanut aningaasaliissutissat akuersissutigineqarput

Mittarfinnut pingasunut, ingerlatsinerup imminut akilersinnaaneranik takutitsisussamik pilersaarusioqqaartoqaqqaassaaq.

- Imaassinnaasoq mittarfiit arlaat teknikkikkut akunnattoornermik  aningaasartuuteqarpallaarnermilluunniit allamilluunniit peqquteqarluni ingerlatani akuujunnaartoq.

Imminullu akilersinnaanngitsumi mittarfiliortoqarnissaa unnersuussutiginagu taassuma aalajangiusimavaa.

- Mittarfik imminut akilersinnaananilu illersorsinnaanngippat, taava takorloorsinnaanngilara siulersuisuusugut arlattaluunniit Namminersorlutik Oqartussanut mittarfiliornissaq siunnersuutigissagaat, Kalaallit Airportsimi siulersuisuni Siulittaasoq Leo Larsen oqarpoq.

Mittarfinnik sanaartorneq 2018-ip naalernerani aallartinneqassasoq taassuma neriuutigaa.