VIDEO Randi Vestergaard: Ernumanartortaqanngilaq
Naalakkersuisut 2017-imut aningaasaqarnermut inatsisissatut siunnersuutaat Aningaasaqarnermut Naalakkersuisup Randi Vestergaard Evaldsenip pingasunngormat ualikkut saqqummiuppaa, KNR-ikkullu Qanoruumi unnukkut pulaartigineqarpoq.
Siunnersuummi takuneqarsinnaavoq, naalakkersuisut nunatta karsianut ukiuni sisamani iluanaarutissatut naatsorsuutigisaat annertuallaanngitsut. Annertorpalunngikkaluartulli missingersuutit ajunngitsut, Randi Vestergaard Evaldsen isumaqarpoq.
- Isumaqanngilanga annilaanganartoqartoq, uani missingersuutinut piviusorsiortorujussuupput aamma naatsorsorluagaapput, soorunalimi pilersaarutit imaassinnaavoq arlaatigut ajunnginnerup tungaanut imaluunniit ajornerup tungaanut ingerlasoortut, kisianni piviusorsiortorujussuupput, aammalu naalakkersuinikkut isumaqarpugut angusassat anguniarneqarsinnaasut, Randi Vestergaard Evaldsen oqarpoq.
Aamma atuaruk Suliffillit soraarnerussutisiassanut pinngitsaaliissummik katersilissapput
Randi Vestergaard Evaldsenip aamma nassuerutigaa, inuiaqatigiinni pinartunik unammilligassaqartugut taakkulu aaqqiivigineqartariaqartut.
- Assersuutigalugu utoqqaat amerliartorput aammalu sulisinnaasut imaluunniit inuusuttut sulineq ajortut imaluunniit ilinniagaqanngitsut amerliartorput, taamaammat pilersuisussat, pilersuisinnaasut ikiliartorlutik, taanna unammilligassarput annertunerpaavoq. Taakkualu iliuusissat aaqqissuusseqqinnikkut iluatsissavagut, Randi Vestergaard Evaldsen oqarpoq.
Apersorneqarnera tamaat videokkut isiginnaaruk.