Randi V. Evaldsen Demokraatini siulittaasutut qinigaaqqittoq
Taamatut aamma politikkimut akisussaasuulluni siulittaasup tulliatut qinigaaqqippoq Justus Hansen, Nivi Olsen aaqqissuussaanermut akisussaasuulluni siulittaasup tulliatut qinigaavoq kiisalu Karen M. Lynge aningaaserisutut qinigaaqqilluni. Demokraatit tusagassiorfinnut nalunaaruteqarlutik taama ilisimatitsipput.
Demokraatit nalinginnaasumik nuna tamakkerlugu ataatsimiinnerminni siulersuisuunernik, ukiuni tulliuttuni marlunni siuttuusussanik qinersipput.
Aningaasaateqarluartut
Nuna tamakkerlugu ataatsimiinnermi iluarisimaarisimaaqalugu paasineqarpoq partiip aningaasarissaartoq. Akiitsoqartoqanngilaq aamma aningaasanik tigoriaannarnik peqarluarpoq, tamannalu pingaarluinnarpoq ukiuni aggersuni marlunni tulleriiginnarmik qinersisoqartussaammat (2017-imi kommuninut 2018-imilu Inatsisartunut), partii taama allappoq.
Demokraatit siulersuisuuneri septembarip 17-ani nuna tamakkerlugu ataatsimeereernerup ima isikkoqalerput:
Siulittaasoq Randi V. Evaldsen, politikkimut akisussaasuulluni siulittaasumut tullersorti Justus Hansen, aaqqissuussaanermut akisussaasuulluni siulittaasumut tullersorti Nivi Olsen, aningaaserisoq Karen M. Lynge, ilaasortaq Jens Frederik Nielsen, ilaasortaq Karl Peter Herlufsen, ilaasortaq Jeppe Carstensen, sinniisusaq siulleq Gerda Vilholm kiisalu sinniisussap tullia Esben Christiansen.
