Randi Panamami pisoq uranilu pillugit aperineqarpoq

Akileraartarnermik aaqqissuusseqqinnissaq, Naalakkersuisut aningaasaqarnermut ataatsimoortumik siuariartortitsinissamut attassiinnarnissamullu pilersaarutaata oqariatuutaa, kujataanilu uranisiorniartoqarniarneq pillugu ilaatigut apeqqutigineqarput.

Aamma atuaruk Folketingimi amerlanerussuteqartut urani pillugu inatsisissat akuersaarpaat

Inuit Ataqatigiit sinnerlugit Inatsisartunut ilaasortap, Kalistat Lundip Kuannersuarni aatsitassarsiornermi ajutoortoqassagaluarpat qanoq iliortoqarniarnersoq apeqqutigaa.

Inatsit malinneqartoq

Aatsitassanut inatsit malinneqarumaartoq, tamannalu unioqqutinneqassappat aatsitassarsiornermut unitsitsinissaminnut periarfissaqarluarlutik Randi Vestergard Evaldsenip oqaatigaa.

Akissulli Kalistat Lundip naammaginngilaa.

- Soorunami matuneqarsinnaavoq. Taava kisianni matuneqarpat, taava aatsitassarsiortut oqassapput, patsisissaqanngitsumik matusisoqartoq, VVM-imik (avatangiisinut sunniutaasussanik nalilersuinerit, aaqq.) misissuinerup naammafineqarnera pissutigalugu.

-Taavalu aatsitassarsiorneq aallartereersoq, milliarderpassuarnillu atuisoqareersoq taamatut matusisoqassappat, aatsitassarsioraluartut aningaasarpassuarnik piumasaqarsinnaassanerat uanga aarleqqutigigakku, siumoortumik qularnaarneqarsimanngippat, Kalistat Lund oqarpoq.

Panamami pisoq apeqqutigineqartoq

Aamma partiinit naalakkersuisuutitaqartunit, apeqqutissaqartoqarpoq.

Nunatsinni akileraarutinik Panamami eqqartuussissuserisoqarfik aqqutigalugu peqquserluttuliortoqarsimanersoq, Demokraatit sinnerlugit Inatsisartunut ilaasortap Justus Hansenip apeqqutigaa.

Aamma atuaruk Islandimiut atii 600-it maanna paasineqarput

Tamannalu Danmarkimi oqartussanit misissorteqqusimallugu, Randi Vestergaard Evaldsenip oqaatigaa.

Tamannali Justus Hansenip naammaginngilaa.

- Partiip iluani tamanna qaqikkumaarpara. Naalakkersuisulli Panamami pisumut soqutiginninnerusariaqaraluartut isumaqarpunga. Tassami akileraarutit millionilikkaat tassani pineqarsinnaammata, Justus Hansen Demokraatineersoq oqarpoq.

Aamma atuaruk Islandip ministeriunera: Tunuanngilanga