Assi: Anders Hviid/ft.dk/KNR

URANI VIDEOLLU Folketingimi amerlanerussuteqartut urani pillugu inatsisissat akuersaarpaat

Nunatta uranimik avammut nioqquteqalernissaa pillugu inatsisissatut siunnersuutit, danskit partiivinit tamanit, Enhedslisten minillugu, akuersaarneqarput. Tamannalu namminersorneq pillugu inatsit ataqqillugu pivoq, naak partiit arlallit uranisiorneq tunngaviatigut akerlerigaluaraat.

Nunatta nammineq aalajangiisinnaassuseqarnera uranisiornissamut akuersinermit akerliunermilluunniit pingaarnerutinneqarpoq.

Urani pillugu inatsisissat Nunatsinnut atuuttussat Folketingimi ippassaq marlunngornermi unnukkut oqallisigineqarmata amerlanerussuteqartut taama inerniliipput.

Nunatsinni uranimik piiaanerup nakkutigineqarnissaanut uranillu avammut nioqqutigineqarnerani sillimaniarnermut sinaakkutissat inatsisissatut siunnersuutigineqartuni aalajangersarneqartussaapput. Aammattaaq inatsisip aappaani Danmark pisinnaatitaassaaq urani Nunatsinneersoq kimut nioqqutigineqarnissaa aalajangissallugu.

Aamma atuaruk Eqqartuussissuserisut: Urani pillugu inatsisissatut siunnersuutit tunngaviusumik inatsimmut naapertuutinngillat

Aamma atuaruk Urani pillugu siunnersuutit politimesterip ernumanartoqartikkai

Inatsisissatullu siunnersuutit Folketingimi amerlanerussuteqartunit akuersaarneqarput. Taakkununnga aamma ilaapput uranisiornermut tunngaviatigut akerliusut, ilaatigut partii Alternativet. Tamannalu Nunatsinni namminersorneq pillugu aaqqissuussisimaneq ataqqiniarlugu pivoq.

- Kunngeqarfimmi Danmarkimi uranimik avammut nioqqutissiortunngornissarput aammalu Kalaallit Nunaanni uranimik piiaasoqarnissaa nuannarinngilluinnarparput (...). Taamaakkaluartoq isumaqarpugut Kalaallit Nunaanni Namminersorlutik Oqartussat aamma tamat oqartussaaqataanerisa ingerlanneqarnerat ataqqisariaqarlutigu, aamma aalajangiinerit isumaqataaffiginngikkaluarutsigilluunniit, partiip Kalaallit Nunaannut tunngasunut oqaaseqartartua Nikolaj Amstrup taama oqarpoq.

 

 

Partiit Liberal Alliancep, De Konservativet aamma Dansk Folkepartiip inatsisissatut siunnersuutit aamma akuersaarpaat.

De Konservativet isumaqarput atomip nukinga nunarsuarmi nukissiuutitut suli pisariaqartinneqartoq, uranilu tamatumunnga atorluarneqarsinnaasoq. Inatsisilli namminersoq pillugu inatsimmi killiliussanut naapertuunnersut qulakkeerniarlugu Inatsisartut qanoq isumaqarnersut paaseqqaarusuppaat, Rasmus Jarlow De Konservativeneersoq taama oqarpoq.

Dansk Folkeparti suliamut inaarutaasumik akuersitinnani Kuannersuarni suliniummut VVM-imik nalunaarusiaq takoqqaarusuppaa. 

- DF-illi siunnersuutinut ilaliinera Kalaallit Nunaanni qinngornernik ulorianartunik akulinnik piiaanissamut inaarutaasumik akuersinerunngilaq, Jeppe Jakobsen DF-imeersoq taama oqarpoq.

De Radikalet, Venstrep SF-illu Nunatta pisuussutiminut uumaatsunut nammineerluni aalajangiisinnaassuseqarnera ataqqillugu siunnersuutit akuersaarpaat, partiilli tamatumunnga peqatigitillugu naqissuserpaat siunissamut ernumassuteqarlutik aammalu Nunatsinni innuttaasunik taasititsisoqarnissaanik kajumissaaruteqarlutik.

Aamma atuaruk Demokraatit: Urani pillugu innuttaasunik taasititsisoqassanngilaq

- SF-ip uranisiortoqarsinnaanera qularnartoqartittupilussuuaa, kalaallilli namminneq aalajangiisinnaassuseqarnerat ataqqillugu (...). SF-ip Kalaallit Nunaanni pissutsit akuliuffigissanngilai, Namminersorlutilli Oqartussat pissutsinut taama sunniuteqartigisussanut tunngatillugu amerlanerussuteqaqqalaaginnarlutik ilungersunartupilussuarmik inississimalersut oqaatigerusupparput, SF-ip Kalaallit Nunaannut tunngasunut oqaaseqartartua Karsten Hønge taama oqarpoq.

Aamma danskit nunanut allanut ministererisimasaata Martin Lidegaardip - De Radikalet Kalaallit Nunaannut tunngasunut maanna oqaaseqartartuata - qularnartoqartippaa:

- Aningaasalersuisartuusuuguma sukumiisumik missueqqaassagaluarpunga, pineqartormi inuiaqatigiinni kalaallini avissaartuussutaavoq, taamaammat kalaallit politikeriisa akornanni isumaqatigiinnerusoqarnissaa aamma neriuutiginaraluarpoq. Kalaallit Nunaatali tamanna nammineq aaqqinniagassaraa.

Enhedslisten danskit partiivini kisiartaalluni Danmarkip uranisiornissamik unitsitsisariaqarnera aalajangiusimavaa.

Enhedslisten naapertorlugu nunani tamalaani uranimik nioqquteqarnermi anngiortumik tuniniaasorpassuaqarpoq uranilu sakkussiornermut atugassatut tuniniarneqartarluni. Taamatullu pisoqarsinnaanera Naalagaaffeqatigiit pinngitsoortittariaqarpaat, partiip Kalaallit Nunaannut tunngasunut oqaaseqartartua Christian Juul taama oqarpoq.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat