RAL: Isornartorsiuineq tunngavissaqanngilaq
- Isornartorsiuineq ingerlatsinitsinnut naleqqiullugu tunngavissaqanngilaq, RAL tusagassiutinut taama allaaserisaqarpoq.
Aviisip AG-p inuussutissarsiortut atuisartut arlaqartut RAL-imit sullinneqarnerminnik iluarisimaarinnginnerat februaarimi allaaserereeraalu umiarsuaatileqatigiiffik taama nalunaaruteqarpoq.
RAL-ip qarasaasiatigut atortut nutaat upernaaq atulermagit kinguaattoortoqartalerpoq kukkusumillu nassiussisoqartalerluni, tamannalu umiarsuaatileqatigiiffiup aamma nassuerutigaa.
RAL: Containerinik ingerlatsineq aalaakkaasuuvoq
Isornartorsiuinerli kingulleq tunngavissaqanngitsoq RAL-ip oqaatigaa:
- 2018-imi januaarimiilli ukiup qanoq ilinera eqqarsaatigissagaanni piffissamik eqquisinnaassuserput nalinginnaasuuvoq, aamma containerinik ingerlatsineq aalaakkaasuuvoq, umiarsuaatileqatigiiffik taama tunngavilersuivoq.
RAL-imut isornartorsiuisoqarneranut atatillugu politikkikkut illuatungiliuttut Demokraatit siulittaasuata, Randi Vestergaard Evaldsenip Naalakkersuisut siulittaasuannut, Kim Kielsenimut umiarsuaatileqatigiimmi torersaanissaanik piumasaqaateqarfigaa.
Tamannali isornartorsiuinermi tunngavissaqanngitsoq, Royal Arctic Linemi siulersuisunut siulittaasoq, Kuno Fencker, pisortarlu Verner Hammeken akissuteqarlutik allapput:
- Naalakkersuisunut Inatsisartunullu ilaasortanut paasissutissiilluta ataatsimiititsinitsinnut takkuttartut pitsaasumik suliamillu ilisimaarinnittumik oqaloqatigaavut, sulilu oqaloqatigalugit, siulersuisunut siulittaasoq pisortarlu ataatsimut tusagassiutinut taama allapput.
