Evaldsen: Kim Kielsen RAL-imut aaqqiisariaqarpoq
RAL-ip sullissinera ukiup kingulliup ingerlanerani isornartorsiorneqartarsimavoq. Kingullermik AG-ip allaaseraa inuussutissarsiortut RAL-ip sullissinera assut naammagittaalliutigigaat.
Aalborgip umiarsualivianik isumaqatigiissummit aniniarneq februaari qaammataagaa qulequtsiullugu sammineqaqattaarpoq.
Illuatungiliuttut siulittaasuat Randi V. Evaldsen isumaqarpoq politikkikkut akuleruttoqartariaqalersoq:
- Siulersuisut Naalakkersuisullu piginnittutut ajornartorsiummik aaqqiisinnaanngillat. RAL innuttaasunut, suliffeqarfinnut, inuiaqatigiinnullu ajoquseeqisumik asuli sarfaatsinneqarsimavoq, Evaldsen tusagassiuutinut allappoq.
Siulittaasoq: Aqutsisut tatigilluinnarpavut
Taamaattumik Naalakkersuisut siulittaasuat iliuuseqaqqullugu piumaffigaa.
- Kim Kielsenip akisussaaffik nammineq tigullugu RAL-imi torersaasariaqarpoq, siulersuisummi Erik Jensenillu ersareqisumik suliassaminnik naammassinnissinnaannginnertik takutereermassuk, Evaldsen taama allappoq.
RAL-imi siulersuisuni siulittaasup Kuno Fenckerip februaarip 14-ianni AG-mut nassuiarpaa IT-mi atortut taarsersortariaqavissimasut, aammalu suliffeqarfimmut Nuup umiarsualivittaarnera unammillernartoqarsimasoq.
- Royal Arctic Linep unammilligassaanik aqutsisut aaqqiisinnaanerat tatigilluinnarparput, Kuno Fencker oqarpoq.
Attaveqaqatigiinnermut naalakkersuisup Erik Jensenip ukiarmi RAL-imi siulersuisut eqqissisippai, oqarluni suliffeqarfiup ajornartorsiumminik aaqqiisinnaanera tatigigini.
