RAL-imi ajornartorsiutit Siumup aaqqiivigeqqugai
Siumup naalakkersuinikkut oqaaseqartartua Jess Svane tusagassiorfinnut taama nalunaaruteqarpoq:
- Nunarsuarmioqatigiinnut ajornannginnerusumik nassiussuinikkut attaveqalernissamik tunngavilimmik atortorissaarutinik nutarterineq uggornartumik inuiaqatigiinnut tamanut attuisoq Siumumit arajutsisimanngilarput. Tamannalu piaartumik aaqqiivigineqassasoq kaammattuutigaarput, Jess Svane taama oqarpoq, nangillunilu:
- Taamaammat naalakkersuisunut kaammattuutigissavarput ajornartorsiutaasut qaangerniarlugit RAL-ip siuttuinik oqaloqateqarnerit piaartumik aallarteqqullugit ingerlatseqatigiiffiup kiffartuussiveqarfia inuiaqatigiinnut tamanut tunngasuummat, Siumup oqaaseqartartua oqarpoq.
AAMMA ATUARUK RAL: Isornartorsiuineq tunngavissaqanngilaq
RAL-imut isornartorsiuisoqarneranut atatillugu politikkikkut illuatungiliuttut Demokraatit Naalakkersuisut siulittaasuannut Kim Kielsenimut umiarsuaatileqatigiiffimmi torersaanissaanik piumasaqaateqarput.
Aviisip AG-p inuussutissarsiortut atuisartut arlaqartut RAL-imit sullinneqarnerminnik iluarisimaarinnginnerat februaarimi allaaserereeraalu taama kaammattuisoqarpoq.
Isornartorsiuinerli kingulleq tunngavissaqanngitsoq RAL-ip oqaatigaa:
- 2018-imi januaarimiilli ukiup qanoq ilinera eqqarsaatigissagaanni piffissamik eqquisinnaassuserput nalinginnaasuuvoq, aamma containerinik ingerlatsineq aalaakkaasuuvoq, umiarsuaatileqatigiiffik taama tunngavilersuivoq.
