Sulisitsisut: Raajartassiinikinneruneq suliffissakinnerulersitsissaaq
Aappaagumut raajartassiissutissatut siunnersuutit ukioq manna 2023-mut naleqqiullugit 15.000 tonsinik appasinnerussasut, Pinngortitaleriffiup siunnersuutigaa.
Tassa katillugit 95.000 tonsit Kitaani aappaagu 2024-mi raajartassiissutigineqassasut, Pinngortitaleriffiup siunnersuutigaa. Siunnersuutaalu malinneqarpat, nunatsinni inuussutissarsiornermut kingunerluttussaassaaq.
- Raajartakinneruneq iluanaarutikinnarnerussaaq, tassa assaat pisariaqartinneqartut ikinnerulertussaassapput. Tassa suliffissakinnerulersitsisinnaasoq sillimaffigisariaqarparput, Sulisitsisut pisortaat Christian Keldsen KNR-imut oqarpoq.
KNAPK-p siulittaasua, Nikkulaat Jeremiassen, isumaqataavoq. 15.000 tonsinimmi raajartassiinikinneruneq kingunerlungaatsiarsinnaasoq, taanna oqarpoq.
- Nunatta karsianut sunniuteqassaaq, taavalu aalisartunut. Pinngortitaleriffiup siunnersuutigisaatulli tonserpassuarnik, tassa 15.000 tonsinik appaasoqassappat kingunerluttussaavoq, Nikkulaat Jeremiassen KNR-imut oqarpoq.
Tonsit qassit raajartassiissutigineqassanersut Naalakkersuisut aalajangigassaraat, Pinngortitaleriffiullu siunnersuutigisaatulli annikitsiginavianngitsut, Christian Keldsenip ilimagaa.
- 95.000 tonsinit qaffasinnerulaartumik raajartassiissangatippakka, taamaaliussagaluarpatalu ukioq manna raajartassiissutininngarnit 12,5 procentit missaannik pisassiinikinnerusussaassapput. Tamannalu iluanaarutikinnarnerusussaassaaq, aamma suliffissakinnerulersitsisussaassaaq, taanna oqarpoq.
Attanneqarsinnaasumik raajarniarnissaq pingaartoq
Tamanna aalisakkerivinni suliffissakinnerulersitsinermik kinguneqarunarsinnaagaluartoq attanneqarsinnaasumik raajarniarnissaq pingaartoq, Christian Keldsen isumaqarpoq.
- Pinngortitaleriffiup pisassiissutissatut siunnersuutaat raajaqassutsip inuiaqatigiillu napasinnaassusiat sapinngisamik illersortarparput. Raajaarukkiartunnginnissaanik sulissuteqarnissarput pingaarpoq, ingammik kinguaariit tullii aamma eqqarsaatigalugit.
Ilaatigut raajat amerlanerpaaffissaminiinnginnerat raajallu namminneq toqusut nalinginnaasuminngarnit amerlanerunerat, Pinngortitaleriffiup 2024-mut raajartassiissutissasut siunnersuuteqarnermini aallaavigai.
Raajaqassuseq pisassiissutissatut siunnersuuteqarnermi kisiat isiginiarneqartussaanngitsoq, Christian Keldsen erseqqissaavoq.
- Nunatsinni inuussutissarsiutini pingaarnerpaaq eqqartortillugu raajaqassutsip inuiaqatigiillu napasinnaassusiat eqqaamassallugit pingaarpoq, taanna oqarpoq.
Sikorsuit ajornartorsiortitsisut
Kitaata avataani kilisaatit juulip naanissaata tungaanut Kitaata sikorsuinik ajornartorsiortitaasarsimasut Pinngortitaleriffiullu kilisalluni misissuineranut aamma ajoqutaasimaqisut taamaammallu sumiiffiit ilaanni 2023-mi misissuisoqarsinnaasimanngitsoq, Pinngortitaleriffik tugassiorfinnut nalunaarummini allappoq.
Paasissutissat raajaqassutsimut tunngasut sumiiffiit ilaanni amigaataanerisa kingunerisaanik ukiuni kingullerni tallimani siunnersuinerit agguaqatigiisinneqarneri siunnersuinissamut atorneqarsimapput, siunnersuinerlu 2024-moortoq taamaasilluni nalinginnaasuminngarnik nalorninartoqarnerusinnaavoq.
Tamannarpiarlu KNAPK-p siulittaasuata arajutsisimanngilaa.
- Uani paasissutissat anngunneqartut aallaavigalugit raajaqassutsip misissorneqarnerani sikorsuit akorngutigalugit misissuilluartoqarsimanngilaq. Tassa misissuineq tamakkiisumik tutsuigisinnaanngilarput, Nikkulaat Jeremiassen oqarpoq nangillunilu:
- Tamakkiisumik misissuisimallutik taamatut oqariartuuteqarpata, aamma malinniagassaavoq, kisianni aalisartut allaanerusumik aammalu oqariartuuteqarsimappata qularinngilara Naalakkersuisut allaanerusumik aamma inernileeratarsinnaasut.
Akitsuineq raajanullu akitsuutit
Raajartassiinikinneruneq iluanaarutikinnarnerussappat, annaasavut aassigiinngitsutigut qanoq iliuuseqarnikkut matussuserniarsinnaagivut, Sulisitsisut pisortaat isumaqarpoq.
- Raajanik akitsuinikkut immaqa matussusilaarsinnaavagut, taamaalioruttali annaasavut tamakkiisuk matussusernavianngillat. Taamaammat raajartassiinikinneruneq nunatsinnut pitsaanngitsumik sunniuteqartussaassaaq, Christian Keldsen oqarpoq.
Raajalli akii nunarsuarmi niuffaffinni qaffakkaluarpata, tamanna sunniuteqarluartussaassaaq. Naak Sulisitsisut tamanna aalajangersinnaanngikkaluaraa, Christian Keldsenip oqaatigaa.
Aalisakkanut akitsuutit aamma misissorneqarsinnaasut, taanna erseqqissaavoq.
