Pinngortitaleriffik: 2024-mut raajartassiissutit apparneqartariaqarput
Pinngortitaleriffiup 2024-mut raajartassiissutissatut siunnersuutai ukioq mannamut naleqqiullugit ikinnerupput.
Aappaagumut raajartassiissutissat siunnersuutit ukioq manna 2023-mut naleqqiullugit 15.000 tonsinik appasinnerupput.
Pinngortitaleriffik tusagassiorfinnut taama nalunaaruteqarpoq.
Tassa aappaagu 2024-mi raajartassiissutissatut siunnersuutigineqartut 95.000 tonsiupput.
Tunumili raajartassat 2024-mi 500 tonsinik amerleriassapput, 2024-mut raajartassatut 2.500 tonsit siunnersuutigineqarmata.
Pinngortitaleriffiup 2024-mut raajartassiissutissatut siunnersuutai Naalakkersuisunut tunniunneqareerput, raajammi tonsit qassit nunatsinni pisassiissutaassanersut Naalakkersuisut aalajangertussaammassuk.
Saarulleqarnerulertoq raajartallu appariaateqartut
Peqassutsimik naliliinerit aalaakkaasumik raajaqarneranik tikkuussisut nunatta Kitaani siunnersuinermut aallaavigineqarput, pisalli ningitsinikkaaraanni pisarineqartartut appariaateqarsimasut aamma takuneqarsinnaavoq.
Tamatuma saniatigut ukiuni kingullerni aamma saarulleqarnerulersimavoq, raajartortoqarneranik kinguneqartussamik. Tamakkualu kingunerisaanik peqassutsimut ilanngaataasussat ukiup tulliani 50 procentimik qaangerneqarneranik kinguneqariaannaavoq.
Kitaata avataani kilisaatit juulip naanissaata tungaanut Kitaata sikorsuinik ajornartorsiortitaasarsimapput. Sikorsuit Pinngortitaleriffiup kilisalluni misissuineranut aamma ajoqutaasimaqaat, sumiiffiillu ilaanni 2023-mi misissuisoqarsinnaasimanani.
Paasissutissat raajaqassutsimut tunngasut sumiiffiit ilaanni amigaataanerisa kingunerisaanik ukiuni kingullerni tallimani siunnersuinerit agguaqatigiisinneqarneri siunnersuinissamut atorneqarsimapput, siunnersuinerlu 2024-moortoq taamaasilluni nalinginnaasuminngarnik nalorninartoqarnerusinnaavoq.
Tunumi raajat 2023-mi amerlanerpaaffissaminniinngillat, aamma raajat namminneq toqusut nalinginnaasumit amerlanerupput.
Aalisartoqarpiarsimanngilaq, taamaattumillu pisat ataasiakkaarlugit sumiiffik tamakkerlugu peqassutsimut naapertuunnersut oqaatigiuminaappoq.
