Raajarniat kattuffittaartut

Sinerissap Qanittuani Raajarniat Kattuffiat sapaatit akunnerata naanerani ataatsimeersuarnermi kattuffiulerpoq.

Ingerlatseqatigiiffiit Ilulissanit Nuummut sinerissamut qanittumi raajartassallit qulit missaanniittut attaveqaatit atorlugit ataatsimeersuarnermut peqataapput. Taakkua tamarmik KNAPK-mi ukiuni arfineq-pingasuni siulittaasuusimasoq, Henrik Sandgreen siulittaasussamittut toqqaraat, Henrik Sandgreen KNR-mut paasissutissiivoq.

AAMMA ATUARUK Sinerissap qanittuani raajarniat KNAPK-mit aneriarlutik kattuffiliulertut

Kattuffiliortut aalisartunik raajarniaanngitsunik ilaasortaqalernissaminnut tikilluaqqusinikuupput. Pilersitsiviusumilli ataatsimeersuarnermi raajarniat kisimik peqataapput.

- Katuffiup siunertaraa sinerissap qanittuani aalisarnermi inuussutissarsiorneq siuarsassallugu, tamannalu ilaasortanut inuiaqatigiinnullu iluaqutaasumik, kiisalu aamma sinerissap qanittuani aalisarup inuussutissarsiutaanerata qulakkeerneqarnissaa, kattuffik tusagassiuutinut allappoq.

Kattuffiliortut taakkua tamarmik KNAPK-mut ilaasortaanikuupput.

KNAPK isornartorsioraat

Kattuffimmili tassani ilaasortat ataatsimeersuarneranni, Henrik Sandgreen siulittaasutut uppitinneqarpoq, taamanimullu Inatsisartunut ilasortaasoq Siumumeersoq, Nikkulaat Jeremiassen siulittasunngorpoq.

Tamannalu ilaasortat arlallit ilaasortaajunnaarnerannik kinguneqarpoq. Raajarniat taakkua januaarip 18-anni ataatsimiikkamik namminneerlutik immikkut kattuffiliussallutik aalajangerput. Taakkua KNAPK-p raajarnianut sullissinera amigarnerarlugu naammagisimaarunnaarlugulu taamani nalunaarput.

Isornartorsiutilli KNAPK-p siulittaasuata Nikkulaat Jeremiassenip ilisarinagit taamani oqarpoq.

AAMMA ATUARUK KNAPK kattuffiliulersaartunit tupaallatsinneqartoq

Raajarniat KNAPK-mit anillutik namminneq kattuffiliornerat, KNAPK-mut ukiumut akiliutigisartagaannit 600.000 koruunit missaannik annaasaqaataassasoq, KNAPK-p siulittaasua, Nikkulaat Jeremiassen KNR-mut siusinnerusukkut oqarpoq.

Raajarniat namminneq kattuffeqalerneratigut nunatsinni sinerissamut qanittumi aalisartut kattuffii pingasunngorput. Kattuffiit allat tassaapput Kalaallit Nunaanni Aalisartut Piniartullu Kattuffiat, KNAPK aamma Sinerissap Qanittuani Aalisartut Piniartullu Kattuffiat, SQAPK.