KNAPK kattuffiliulersaartunit tupaallatsinneqartoq
Kalaallit Nunaanni Aalisartut Piniartullu Kattuffiata raajarniat ilaasortatik tassanngaannartumik annaavaat. Raajarniat KNAPK-mit aniallutik namminneq kattuffiliulersaarnerat, KNAPK-mi siulittaasup tupassutigaa.
- Kattuffimmit tupaallannarpoq. Taama tassanngaannartigisumik kattuffillu taanna pillugu oqaloqatigineqarani aneriasaarnerat kattuffimmut tupannartorujussuuvoq. Eqqarsaaterpassuit soorunami pinngorarput. Sunaana kukkusimagiga kattuffiumuna suna kukkussutigisimagaa, Nikkulaat Jeremiassen KNR-mut oqarpoq.
AAMMA ATUARUK Sinerissap qanittuani raajarniat KNAPK-mit aneriarlutik kattuffiliulertut
Raajarniat KNAPK-mi siulittaasuusimasoq, Henrik Sandgreen siuttoralugu kattuffiliorlutik qaammatip tulliani ataatsimeersuarnissaminnut piareersarput.
Kattuffiliulersaartut isumaqarput KNAPK ima ilaasortaqarpallaartigilertoq allaat ilaasortatik raajarniat naammaginartumik sullissinnaanagit.
- Assigiinngitsunik soqutigisallit akuleriippallaarujussuarsimapput. Anginiaannarluni anginiarsariinnartoqarsinnaannginnami tamakkiisumillu suliassanik naammaginartumik ingerlatsisinnaanani, Henrik Sandgreen, kattuffiliulersaartut oqaaseqartartuat siusinnerusukkut oqarpoq.
Nikkulaat: Avissaarnerput nukittorsaataanngilaq
Isornartorsiulli tamanna nunatsinni aalisartut piniartullu kattuffiini ilaasortaqarnerpaami siulittaasup isumaqatiginngilaa. Nikkulaat Jeremiassenimi naapertorlugu ilaasortat amerlanerugunik kattuffik nukittunerussaaq. Raajarniat maanna kattuffiliulersaarnerat nukillaarsaataasoq taanna isumaqarpoq.
- Taamatut avissaartuunneq eqqarsaatigalugu isumaqarpunga, taamatut aalisarnermi ataatsimoorluni suleriutsit eqqarsaatigalugit nukittorsaataanani nukillaarsaataaginnassasoq, Nikkulaat Jeremiassen oqarpoq.
Taassuma kattuffiliulersaartut tupaallaatigalugillu uggorigaluarlugit ataqqisariaqarlugit aamma oqaatigaa.