Sinerissap qanittuani raajarniat KNAPK-mit aneriarlutik kattuffiliulertut

Raajarniat KNAPK-mut ilaasortat tamarmik kattuffimmit anialeruttorput. Ingerlatseqatigiiffiit taakkua qulit missaanniittut, Ilulissanit Nuummut siaruarsimasut, KNAPK-p raajarniarneq pillugu sulineranut naammagisimaarinnikkunnaarput.

- Tamakkiinerusumik soqutigisatik aallaaviginerullugit ataatsimoorfigisinnaasaminnik uani peqarnissartik sinerissap qanittuani raajarniat uani aalajangiuppaat, oqaaseqartartoq, Henrik Sandgreen oqarpoq.

Taanna KNAPK-mi siusinnerusukkut siulittaasuuvoq.

Sisamat ilaasortaajunnaareertut

KNAPK naapertorlugu, raajarniat maanna sisamat kattuffimmit anillutik allakkatigut nalunaarput.

Taakkuali ikaliartussasut, kattuffiliulersaartut oqaaseqartartuat oqarpoq.

Kattuffiliulertut isumaqarput KNAPK angivallaalertoq. Taamaalilluni kattuffiup raajarniarnermik samminninnera atuisut nuannariunnaarpaat.

- Assigiinngitsunik soqutigisallit akuleriippallaarujussuarsimapput. Anginiaannarluni anginiarsariinnartoqarsinnaannginnami tamakkiisumillu suliassanik naammaginartumik ingerlatsisinnaanani.

Raajarnianngitsut ilaasortaasinnaasut

Raajarniat kattuffiliulersaartuupput. Taakkua aalisartut kattuffianni ilaasortaqarnerpaamut, KNAPK-mut unammillernissartik tunuarsimaarfiginngilaat. Henrik Sandgreen naapertorlugu aalisagaqatigiinnik allanik aalisartut aamma ilaasortanngorusullutik tuttaqartarput. Taakkua mattunneqanngillat.

- Aalisarnermik inuussutissarsiuteqartut ataatsimut kateriffigisinnaasaattut neriuppunga una aamma inissisimassasoq. Taamaammat sinerissap qanittuani raajarniat aamma aalisariaatsinik allanik ingerlataqartut tikilluaqquaat, Henrik Sandgreen oqarpoq.

Raajarniat kattuffiliulersaatut ataatsimeersuarnissartik qaammatip tulliani naatsorsuutigaat. Qaqugorpiaassanersorli suli ullulernagu. Henrik Sandgreenip siulittaasutut sassassanerluni suli isumaliuutigaa.