Nuna tamakkerlugu sungiusaasoq: Qulisamik Kalaallit Nunaanni arsaaffittaarnissamut piffissanngorpoq
Ukiorpassuit oqaloreernermi iliuuseqarnissamut piffissanngorpoq.
Taama oqaaseqarpoq silami arsaannermi nuna tamakkerlugu sungiusaasoq Morten Rutkjær qulisamik arsaaffiliorsinnaaneq eqqarsaatigalugu.
- Qularutiginngivippara qulisamik arsaaffittaarniarnissamut aalajangernissaq maanna pisariaqartoq, Morten Rutkjær KNR-mut oqarpoq.
Nuna tamakkerlugu sungiusaasutut 2020-mi atorfinippoq silamilu arsaattartut ineriartornerat naammagisimaarlugu.
Qulisamik Nuummi llulissanilu arsaaffiliornissamik isuma nutaajunngilaq.
Suleqatigiissitat allaaserinninnernik periarfissallu titartagartaannik saqqummiussisareerput.
- Maluginiarpara ukiorparujussuarni tamanna oqallisigineqartoq iliuuseqartoqarniaranilu. Isumaqarpunga maanna iliuuseqarnissaq pingaaruteqarluinnartoq, Morten Rutkjær oqarpoq.
Siunissaq pillugu aningaasaliineq
Nunanut allanut unammisatut aasaq Island Gamesimi peqataapput ujaminnanniunnerilli avataannut kalaallit inissipput unamminerni aallarniutaasuni pissanganartunik unammisareerlutik annikitsut amigaatigilaarlugit ajorsartarlutik.
- Eqqarsaatigisariaqarparput arsaattartuvut unammiartormata sapaatit akunnerit tallimat arfinillit Island Games sioqqullugu sungiusareerlutik, Morten Rutkjær oqarpoq.
- Unammisatta inuussutissartigalugu arsaattartuupput. Taakku ukioq kaajallallugu sapaatip akunneranut sisamariarlutik tallimariarlutilluunniit unammillutillu sungiusartarput. Taamaattumik kalaallit arsaattartuisa tamakku naligalugit arsaassinnaammata nersualaagassaapput, Morten Rutkjær oqarpoq.
Nunatsinni silami arsaattarneq nunanit allanit aamma soqutigineqarluarpoq. Piviusulersaarutinik aallakaatitassiortartut USA-meersut Europameersullu tamassa aallakaatitassiorput.
- Aalangertussanut immaqa massakkorpiaq aningaasaliissutit aningaasarpassuupput.
- Siunissarli ungasinnerusoq eqqarsaatigalugu meeqqat peqqinnerulernerat avatangiisini pitsaasuni nuannersumik ataatsimooriaaseq pilersinneqarsinnapput. Maannakkorpiaq aningaasarpassuugaluartut siunissaq ungasinnerusoq isigalugu imminnut akilissaqqaarput, Morten Rutkjær oqarpoq.
