Qujaukitsup isornartorsiuisut paasilluarpai
Inuplanimiit, Halibut Greenlandimiit Kalaallit Nunaanni inuussutissarsiuteqartut sinnerlugit sulisitsisullu peqatigiiffiannit uparuaanerit, inuussutissarsiornermut naalakkersuisup, Vittus Qujaukitsup paasisinnaavai.
-Suliat sukkanerisaanerinnut ujartuinerinerat paasisinnaavara, taamaattumik kommunit suleqatigalugit qanoq isilluta sukkanerusumik kiffartuussisinnaanerput oqaloqatigiissutigissuarput,Vittus Qujaukitsoq oqarpoq.
Naalakkersuisoqarfiup sullissinera isornartorsiorneqarmat, inuussutissarsiornermut naalakkersuisup kommunip namminersorlutik oqartussallu iluanni equngasoqartoq nassuerutigaa.
-Una nassuerutigisariaqarpoq, namminersorlutik oqartussat kommunillu akornanni akisussaaffinnik avitseqatigiissimanermi arlalippassuarni equngasoqarami, Vittus Qujaukitsoq oqarpoq.
Aamma atuaruk Namminersortut pisortanut: Arriippallaamik ingerlatsisoqarpoq
Pisortat atorfillit pissaaneqarpallaarnerarpaat ingerlatsinermilu aningaasartuuteqarpallaartut Inuplanip pisortaata, Kristian Lennertip isorinninnermini oqaatigaa.
Pisortat pissaaneqarpallaarsimapput
Inuussutissarsiornermut tunngatillugu ajornakusoortumik katitigaavallaartumik immaqalu inuussutissarsiornermi sinaakkusiinermi pissaaneqarpallaarlutik Vittus Qujaukitsup nassuerutigalugu oqaatigaa.
Namminersorlutik inuussutissarsiortuni pisortat, Kristian Lennert, Brian Buus Niels Thomsinilu tamarmik isumaqarput pisortat suleqatigiilluarnerusariaqartut.
Tassungalu tunngatillugu, namminersorlutik inuussutissarsiortut tapersersorniarlugit suleqatigiinnerunissaq, oqaloqatigiinnikkut anguneqassasoq, naalakkersuisoq Vittus Qujaukitsoq oqarpoq.
Naalakkersuisut kommunit sisamaasut peqatigalugit juunip aallartinnerani suleqatigiinneq pillugu oqaloqatigiittussaasut, naalakkersuisup ilaatigut oqaatigaa.
