Namminersortut pisortanut: Arriippallaamik ingerlatsisoqarpoq
Namminersorlutik inuussutissarsiuteqartut suliniuteqarnissamut akuerineqarnissartik pillugu nunatsinni pisortat ingerlatsiviinut saaffiginnissuteqarnerminni aporfeqartarnertik imaluunniit tusagaqartannginnertik qatsuppaat.
Namminersorlutik inuussutissarsiuteqartut pitsaanerusumik suleqatigiinnissaq, allaffissorneq annikinnerusoq saaffiginnissutinillu sukkanerusumik suliaqartarnissaq ujartorpaat - taamaattoqangippat inuiaqatigiit millionerpassuarnik pissarsinngitsooratarsinnaammata.
Inuussutissarsiutit pillugit ataatsimeersuarnerup Future Greenlandip sisamanngormat naammassineqartup kingorna taama isornartorsiuisoqarpoq. Kalaallit Nunaanni namminersorlutik inuussutissarsiuteqartunut isumassarsianik periarfissanillu nutaanik nassaarsiornissaq ataatsimeersuarnermi siunertarineqarpoq.
Allaffissorneq annertuallaaqaaq suleqatigiinnerlu pitsaasuunani
Aallaqqaasiutigalugu pisortat namminersorlutik inuussutissarsiuteqartunik sullissinerat pitsanngorsarneqarsinnaavoq. Sullissineq arriippallaaqaaq - suliaq aallartinneqarsimappat, aamma allaffissorneq annertuallaaqaaq suleqatigiinnerlu pitsaasuunani. Nunatsinni suliffeqarfinni pisortat pingasut taama isornartorsiuipput.
- Allaffissorneq annertuallaarpoq nuussinermullu aningaasartuutit amerlavallaarlutik, allatut oqaatigalugu, kinguneqarpiartussaanngitsunut piffissamik atuisoqarpallaarpoq, Kristian Lennert Inuplanimeersoq taama oqarpoq.
Halibut Greenlandip pisortaa Niels Thomsen aamma isumaqarpoq sullissineq arrippallaarujussuartoq. Taassuma akineqanngitsoortarnini arlaleriarluni nalaattarsimavaa - tigussaasumillu assersuutitut taavaa qinnuteqaatimi ilaata akineqanngitsoornera pissutigalugu nammineq nunattalu ukiumoortumik 150 millionit koruuninik isertitaqarfigisinnaasaa iluatsinngitsoorsimasoq.
- Aningaasarsiornissamut periarfissat ikilisarput, tamatumalu malitsigisaanik akileraarutitigut, akitsuutitigut allatigullu akilertakkavut aamma ikilillutik. Tassa imaappoq, akileraartarnikkut tunngavissarput annikinnerulissaaq tamannalu soorunami nunatta aningaasaqarnernut pitsaanngitsumik sunniuteqassalluni.
Aamma atuaruk Kielsenip Future Greenland paasissutissanik pingaarutilinnik pissarsiaqarfigaa
Kalaallit Nunaanni Sulisitsisuni, namminersorlutik inuussutissarsiuteqartut ilarpassuinik sullissisuusuni, pisortap Brian Buusip taamatut isornartorsiuisoqarnera isumaqatigaa - sullissineq arriippallaaqaaq, allaffissorneq annertuallaaqaaq suleqatigiinnerlu pitsaasuunani.
- Taamatut naliliisoqarnera eqqortuuvoq iliuuseqarfigineqartariaqarlunilu. Aamma soorunami neriuutigaara politikkikkut ingerlatsinermi eqqarsaatigineqassasoq aalajangiinerit akuersissutillu ingerlanneqartarnerisa pisariillisarneqarnissaat qanoq anguneqarsinnaanersoq, ullumikkummi tamakku arriippallaarujussuarmik ingerlanneqartarmata.
