- Qujanaq, akoorutissat pillugit piumasaqaatit sakkortunerusariaqarput
Uuliasiorluni qillerinerit pillugit paasinarluartumik kalaallisut danskisullu, tassa tuluttuunngitsoq Namminersorlutik Oqartussat ersarissumik ilisimatitsisarnissaat Naaja Nathanielsen-ip IA-meersup ujartorpaa. Tamanna Aatsitassanut Naalakkersuisup Ove Karl Berthelsenip ammaffigaa nangillunilu oqarluni pineqartoq pillugu piviusut tunngavigalugit aallakaatitassiortoqassamaartoq.
Naaja Nathanielsenip § 37-mut apeqquteqaataanut oqallisigineqaqisumut atatillugu, Namminersorlutillu Oqartussat paasissutissiisarnerannut tunngatillugu oqallinnermik pilersitsisumut tunngatillugu apeqqutit pitsaanerusumik akineqartariaqarsorineqarput. Ilaatigut pineqarput akoorutissat arrortikkuminaatsut eqqarsaatigalugit killissarititaasunik qaffasissusiliinissanut tunngatillugu akuerineqartussatut Nathanielsenimit ujartorneqartut.
- Qaffasissutsit eqqarsaatigalugit qanoq annertutigusumik akuerineqartumik akuutissat atorneqartarnissat pillugu Namminersorlutik Oqartussat suliaqartariaqaraluartut isumaqarpunga. Tassami ullumikkut akuutissat allattorsimaffimmiittut atorneqannginnissaanik kissaateqaraluarluta, suli atortuarpagut, Naaja Nathanielsen oqarpoq, qaffasissusitsit pillugit aalajangersaasoqarnissaanik ujartuilluni.
Taamaattorli Ove Karl Berthelsenip Naalakkersuisullu akissutaannut iluarisimaarinnippoq.
- Akissuteqaat takkussimasoq pitsaasuullunilu imartuujusoq isumaqarpunga akissutigineqartullu amerlanersaat naammagisimaarpakka.
Tusarniaasarnerup sapaatit akunnerini arfinilinni sivisussuseqartartup sapaatit akunnerinik marlunnik sivitsorneqarniarnera, ilaatigullu ajutoortoqartillugu ilisimatitsisarnissaq nalunaaquttap akunnerinut 52-inut aalajangersarneqarnerata ilisimatitsissutigineqarnera aamma qillerinermi marulluup atorneqartartup uuliamit pisuunngitsup kisiannili imermit pisup kisimi atorneqartarnissaa pillugu Namminersorlutik Oqartussanit akuerineqarniarnera toqqissisimanartuusoq, ilanngullugu oqaatigaa.
Akoorutissat allattorsimaffimmi aappalaartumiittutut taaneqartartut saniatigut amigaataasorisanik Namminersorlutik Oqartussat ilisimasassanik ujaasinerusariaqaraluartut aamma oqaatigineqarpoq.
Exxon Valdezip Alaskap eqqaani uuliaarluernerata kingorna Cairn Energy aamma DMU misilittagaqarnerulersimapput. Aamma Naalakkersuisut taamaaliortariaqarsimagaluarput tassami ilinniarfigineqarsinnaammat, Naaja Nathanielsen isumaqarpoq.
- Namminersorlutik Oqartussatuulli - Inatsisartuni imalunniit Naalakkersuisuini - Alaskami naalakkersuinikkut ingerlatsisunik, Exxon Valdezip uuliaarluarnerata kingorna mingutitsineq pillugu qanoq suliniartoqarsimanersoq pillugu oqaloqateqarsimanngilagut. Taanna assersuutissaavoq oqaloqatigiinneq aqqutigalugu ilisimasaqarnerulerlutalu pitsanerusumik isumaqatigiinniarnissanut oqaloqataasinnaanermut.