Qivittulikkersaarnermut oqaluttualiamik tunniussinissamut piffissaq qaangiutingajalersoq

Allatta Inuusuttunut-mi ersinartuliamik oqaluttuaaraliornermi unammisitsinermi tunniussinissamut periarfissaq kingulleq qaammatip ulluisa naggataanni killeqarpoq.

Allattoq Hanna Vestergaard Hviid

februaarip 23-at 2023 13:50

Nutserisoq Connie Fontain

Inuusuttut atuakkiortut nammineq ersinartulersaarusiaminnik ulloq nassiussiffissaat nalliutingajalerpoq.

Qivittulersaarummik Allatta Inuusuttunut-mut, siorna novembarimi pilersinneqartumut, tunniussinissamut ulloq kingulleq februaarip ulluisa 28-araat.

NAPA - tassa Nunani Avannarlerni Piorsarsimassutsikkut Attaveqaat tusagassiuutinut nalunaarummi allappoq.

Peqataanissamut piumasaqaatit ikittunnguupput. Peqataaniartut 15-it 25-llu akornanni ukioqassapput, taakkulu takinerpaamik quppernernik 20-nik takissuseqartumik ersinartulersaarummik oqaluttualiussapput. Oqaluttualiaq kalaallisut, danskisut tuluttulluunniit allanneqarsinnaavoq.

OQALUTTUAARALIANNIK ALLATTA INUUSUTTUNUT-MUT IMA NASSIUSSISSAATIT

Oqaluttuaaraliaq februaarip 28-at nalunaaqutaq 23.59 kingusinnerpaamik nassiunneqareersimassaaq

Oqaluttuaaraliaq Worditut imaluunniit PDF-itut uunga nassiunneqassaaq: napa@napa.gl

Mailimi uku ilanngullugit allassavatit:

Atit
Ukiutit
Najugaqarfiit
Oqarasuaativit normua

Nassiussap qulequtaani ima allassimassaaq: Allatta Inuusuttunut

NAPA-mit marsip naanerani imaluunniit apriilip aallartinnerani tusagaqarnissat naatsorsuutigisinnaavat.

Allisiguk

Ajugaasunik qulinik toqqaasoqassaaq, taakkulu Niviaq Korneliussen aamma Paninnguaq Boassen peqatigalugit allannermut pikkorissaanermut ullunik sisamanik sivisussuseqartumut ilaanissamut periarfissaqalissapput.

Oqaluttualiallu qulit tamarmik ukiamut saqqummersinneqarumaarlutik.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.