Qinigassanngortittut: Marlunnik qinigaaffeqarneq iluaqutaassaaq

Doris Jakobsen, Siumumeersoq aamma Knud Kristiansen, Atassummeersoq tamarmik marlunnik ilaasortaaffeqareerput, tassa Inatsisartuni kommunalbestyrelsemilu.

Taakku marluullutik nalunaarutigereerpaat, Folketingimut qinigaassagaluarunik kommunalbestyrelsemi ilaasortaanerminnit tunuarallarniarlutik, kisiannili Inatsisartunit tunuarnissartik eqqarsaatiginagu.

- Inatsisartunit sulinngiffeqarallassaanga, piffissarlu siulleq Folketingemi sulinermut atussallugu, kisianni eqqarsaatigaara piffissap ingerlanerani atorfiit taakku marluk ingerlassinnaalissallugit, isumaqarama tamanna naalakkersuinermi sulinermi nukittorsaataajumaartoq, Doris Jakobsen oqarpoq.

Knud Kristiansen aamma taamatut nalunaaruteqarpoq. Taanna aamma kommunalbestyrelsemi sulinerminit sulinngiffeqarniarpoq, Folketingemili Inatsisartunilu sulinini ingerlatiinnassallugit.

- Suliassanut tunngatillugu marlunnik ilaasortaaffeqarneq pitsaaqutaassasoq isumaqarpunga, taamaammallu naalakkersuinermik suliaqartuulluni Folketingemi Inatsisartunilu ilaasortaaneq iluaqutaaginnassaaq, Knud Kristiansen oqarpoq.

Aammattaaq Akitsinnguaq Olsen Folketingemut qinigaassagaluaruni Inatsisartuni ilaasortaanini qimannavianngilaa.

- Qinigaaffiit marluusut suliarerusunnerussavakka, tassami Inatsisartuni sulinermut iluaqutaaginnartussaammata, taanna oqarpoq.

Niels Thomsen, Demokraatineersoq qinigassanngortittunit sisamaasunit kisiartaalluni marlunnik ilaasortaaffeqarnianngilaq.

- Inatsisartunit sulinngiffeqassaanga Folketingemi sulineq tamakkiisumik ingerlassinnaaniassagakku, isumaqaramami piffissara tamaat tassunga atortariaqarlugu, Niels Thomsen oqarpoq.

Inatsisartunut ilasortaasup kiaagaluartuulluunniit Folketingemut qinigaasup, qaammammut 95.000 koruuninik akissarsiaqalernissani naatsorsuutigisinnaavaa, 55.000 koruunit Folketingemit 45.000 koruunillu Inatsisartuni ilaasortaanerminit.