Politikki

Qinigaasut agguataarneri takukkit

Siumut nunatsinni partiit anginersariuarsinnarpaat 34,3 procentinik taaguunneqarluni - Inuit Ataqatigiinnit 326-inik amerlanerusunik taagunneqarluni, taamaattoq partiit taakku marluk Inatsisartunut ilaasortaatitaat amerlaqatigiissapput. Demokraatit sisamanik ilaasortaatitaqalerput Partii Nalerarlu pingasut, Atassullu nunatsinni partiit mikinersarilerpaat. Partii Inuit Inatsisartunut isertitaqanngitsoorput.

Allattoq Helle Nørrelund Sørensen

novembarip 29-at 2014 08:39

Siumut nunatsinni partiit anginersaraat. Tamanna ippassaq qinersinermi erserpoq, Siumut qinersusut 34.3 procentiinit taaguunneqarmat.

Partiip taamaasillu Inuit Ataqatigiit ajugaaffigeqqarpaa, taanna 33,2 procentinik taaguunneqarmat. Siumup Inuit Ataqatigiillu taaguunneqarneri 326-iinnarnik nikingassuteqarput tamarmillu Inatsisartuni aqqanilinnik ilaasortaatitaqalerput.

Demokraatit qinersisartut 11,8 procentiinit taaguunneqarlutik sisamanik ilaasortaatitaqalerput nunatsinni partiit anginerit pingajorilerlugit.

Partii Naleraq siullerpaamik qinigassanngortitsisoq 11,6 procentinit taaguunneqarpoq pingasunillu ilaasortaatitaqalerluni, Atassullu 6,5 procentinit taaguunneqarpoq Inatsisartuni marlunnik ilaasortaatitaqalerluni.

Parti Inuit 1,6 procentiinnarnit taaguunneqarluni Inatsisartunut isertitaqanngitsoorpoq.

Siumup siulittaasua Naalakkersuisunngortitsiniarnermi aqutsisuussaaq. Taanna Inatsisartuni amerlanerussuteqarnissamut Siumup ilaasortaatitaasa saniatigut ilaasortanik tallimanik suleqatissarsiortussaassaaq.

Inatsisartunut 2014-imi qinersinermi angusat:

Siumut: 10.102 = 34,3 %

Inuit Ataqatigiit: 9.776 = 33,2 %

Demokraatit: 3.468 = 11,8 %

Partii Naleraq: 3.423 = 11,6 %

Atassut: 1.919 = 6,5 %

Parti Inuit: 477 = 1,6 %

Andre partier: 22 = 0,1 %

Najoqqutarisaq: Valg.gl

Taaguunneqarnerpaat qulit ima inissisimapput:

1. Sara Olsvig (IA) 5825

2. Kim Kielsen (S) 4604