Qinersiviit matoreerput: Erdoganip præsidentiunissanersoq aalajangerneqalersoq

Tyrkiami qinersisinnaasut nunami tassani præsidentimut qinersinermi ullumi qinersiartoreerput, taasinerillu kisinneqaleruttorput.

Tyrkiami nutaarsiassaqartitsiviit qinersinermi inerneriugallartut nunatta nalunaaqutaa naapertorlugu ualeru nalunaaqutaq sisamanut aatsaat saqqummiussinnaavaat.

Saqqummiusseqqusaannginnerulli piffissarititaa Tyrkiami qinersinermi ataatsimiititaliap YSK-p siusinnerusukkut atorunnaarsissinnaavaa.

Tyrkiap 2014-imili præsidentia Recep Tayyip Erdogan, partiimit konservatiiviusumit AKP-meersoq, illuatungiliuttullu sassartitaat Kemal Kilicdaroglu, partiit qiterliit saamerliillu CHP-mik ataatsimut taaguusernqarsimasut qinigassanngortitaat, præsidentimut qinersinermi ullumi qinerneqarsinnaapput.

Tyrkiami præsidentimut sapaatit akunnerit marluk matuma siornatigut qinersinermi siullermi qinigassanngortittut arlaannaataluunniit 50 procentit sinnerlugit taaguunneqanngimmat, taamalu amerlanerusssusiisinnaanngimmat, præsidentimut qinersineq immikkoortut aappaannut ingerlaqqippoq.

Erdogan qinersinermi siullermi 49,52 procentinit taaguunneqarpoq, Kemal Kilicdaroglulu 44,88 procentinit taaguunneqarluni.

Recep Tayyip Erdogan Tyrkiami præsidentimut 2014-imi 2018-imilu qinersinerni ajugaavoq, qinersinerit immikkoortuini siullerni taamanikkut amerlanerussuteqarluni.

/ritzau/