Qinersisartut Naalakkersuisut pillarpaat
Qinersisoqartuugaluarpat Siumut qinersisartut 40,6 procentiinit taaneqartut Inuit Ataqatigiit 38,4 procentinik taaneqassagaluarput. 2009-mi qinersineq kingulleq eqqarsaatigalugu, Siumut 14 procenti angullugu siuariassagaluarpoq. Kingullermik qinersinermi Siumut kinguariagaatsiarluni taamaallaat qinersisartut 26,8 procentinit taaneqarput, Inuit Ataqatigiit 44,2 procentinit taaneqartut.
Sermitsialli misissuisitsinerata aamma ersersippaa, maanna Naalakkersuisooqataasut suli amerlanerussuteqassagaluartut, tassa qinersisartut 52,1 procentiisa taakku ataatsimut taassaagaluaramikkit.
Inatsisartuni inissat eqqarsaatigalugit, maannakkut qinersineqartuuppat, Siumut Inuit Ataqatigiillu naligiissagaluarput, tassa tamarmik 13-inik ilaasortaatitaqalissagaluaramik. Demokraatit ataatsimik ikileriartut, Kattusseqatigiit Partiiat Inatsisartuni ilaasortaatitaqarunnaassagaluarpoq.
Taamaattorli Inuit Ataqatigiit Demokraatillu ilaasortaatitassaat eqqarsaatigalugit katinneranni taakku 16-inik ilaasortaatitaqalissagaluarput maanna illuatungiliuttut Siumut Atassullu 15-inik ilaasortaatitaqartut.
Atassut eqqarsaatigalugu, qinersisoqartuuppat taakku ilaasortaatitaat ataatsimik ikileriassagaluarput. Kingullermik qinersinermi pingasunik qinigaatitaqaraluarput Finn Karlsenilli Siumumut nuunneratigut Atassut maanna marlunnik Inatsisartuni ilaasortaatitaqarpoq.
HS Analysep misissuinerani paasinarsivortaaq, Naalakkersuisooqatigiit ikileriarnerannut pissutaasoq, aalisartut, piniartut sulisartullu ilinniarsimanngitsut kingullermik qinersinermi Inuit Ataqatigiinnik taasisimasut maana Siumumut tapersersuilersimanerat.
Qinersisartuni misissuisitsineq pivoq novembarip naaneraniit decembarip aallartilaarnernut, piffissamilu tassanerpiaq avannaani qaleralittassat pillugit oqallittoqangaatsiarpoq, aamma juullertinnagu akissarsisarnerup atorunnaarsinneqarnissaa oqallisaagaatsiarluni aammattaaq aningaasanut inatsisip piviusunngortinniarnerani taassuma amigartooruteqannginnissaa aalajangiunneqarsimalluni.
Qinersisartunik misissuisitsinermut atatillugu Naalakkersuisut siulittaasuat, Kuupik Kleist Sermitsiamut ima oqarpoq:
- Piviusulersaartuuvugut nuannarineqarnissarput pillugu sulinngilagut, tassalu tamanna pillugu qinersisartunit pillarneqarpugut, Kuupik Kleist oqarpoq.
