Qinersinngilaattaa Naalakkersuisut siulittaasuat siumut isigivoq

Qanittumi Naalakkersuisut siulittaasuat naalakersuisunilu ilaasortat pingasut allat kujataani innuttaasunik ataatsimiisitseqattaarput. Tassani immikkut ittumik Kuupik Kleist misigisaqarpoq angut inuusuttoq oqallinnermi eqqarsaatersuumminik saqqummiussimmat.

- Oqaaseqarnermini ataatsimeeqataasugut tamatta tiguartiffigisatsinnik eqqartorpai suliffissaaleqinermut, suliffeqarnermut sulisussaaleqisarnermullu tunngasut. Eqqartorpai ippassaammat erngussimanerup kingorna suliartunngitsoortarneq, eqqartorpaa suliffissaqarani ullaakkut makinnissamut pissutissaqanngitsutut misigisimasarneq, meeqqallu taamaattoqartillugu tulluusimaarutissaqanngitsutut misigisimasinnaanerat aamma eqqartorpai, imminut tatigisinnaajunnaarsinnaaneq, soraarsitaasarnerit aammalu aalisakkat suliarinissaqannginnamik igiinnartariaqalersartut, Kuupik Kleist oqarpoq.

- Oqaaseqarneranili qitiusoq tassaavoq tamatta inuttut akisussaaffeqarnerput immitsinnuinnaanngitsoq aammali meeqqatsinnut, ernguttatsinnut inuiaqatittalu sinneranut. Oqaatsinilu naggaserpai oqarluni nammineernerulernissamik kissaateqarnerput angunavianngikkipput akisussaaffipput sunaanersoq nalugutsigu akisussaassuseqarnerpullu naapertorlugu iliuuseqartanngikkutta, Kuupik Kleist oqarpoq.

Ilanngullugit taavai illoqarfiup aamarsuarsiorfiusimasup inuerunneranit ukiut 40-nngornerata malunnartinniarneqarnera aamma Naalagaaffeqatigiit siuttuisa Savalimmiuni naalakkersuisut siulittaasuata Kaj Leo Johannesenip aamma ministeriunerup Helle Thorning Schmidtip ataatsimeeqatiginerat

Ilanngullugu taakkartorpaa aatsitassat pillugit oqallinneq. Tassanilu inatsisissatut siunnersuutit saqqummiunneqartussat tigulaariffigai. Illuatungiliuttut kissaatigaat aatsitassat uranimik akuat 0,1 procentimut annerpaaffilerlugu killilersuisoqassasoq maannakkut uranimut naaggaavissimaneq allanngorlugu. Tamannalu Kuupik Kleistip oqaaseqarfigaa.

- Oqallinnerup inernissaa siorngerlugu soorunami oqaaseqarfigisinnaanngilara, taamaakkaluartoq manna oqaatigerusuppara.  Oqallinnitsinni aalajangerniarnitsinnilu suliassat marluk imminnit immikkoortissavagut. Uran pillugu politikkimik suliassaq immikkoorpoq, taavalu assersuutigalugu Kuannersuarni aatsitassanik piiaanissamut akuersissummik suliaqarnissaq immikkoorput, Kuupik Kleist oqarpoq.

Nunatsinni pinngortitap kusanaraluarluni qajannarsinnaanera eqqaaneqartut ilagaat, tassanilu eqqarsaatigineqarpoq inuiaqatigiinni allanngulerneq orninneqartoq. Tassungalu tunngatillugu Naalakkersuisut siulittaasuat oqarpoq.

- Siorna Inatsisartut ukiakkut ataatsimiinnerata kingorna maannamut pisimasut eqqaatsiassagukkit naalakkersuinikkut oqallinneq sakkortuseriarsimavoq. Naalakkersuinikkut isumaqatigiinngittarneq soorunami ajunngilaq, kisiannili uagut politikeritut pisussaaffigaarput allat isumaat ataqqillugit oqallittarnissarput, naapigiaasarluta. Politikeritut iliuuserisartakkavut inuiaqatigiinni aamma tuniluuttarput. Taamaammat pingaaruteqarpoq oqallikkaangatta eqqaamajuassallugu inuiaqatigiinnut ajunngitsussaq pillugu aaqqiiniartartussaagatta. Inuiaqatigiit pillugit sulivugut, Kuupik Kleist oqarpoq.

Naalakkersuisut siulittaasuat tikitaasa ilagaat suliffissaaleqineq ilinniartitaanerlu. Taakku imminnut ataqatigiilluinnarnerat eqqartorpaa tassami suliffissaaleqisut 90 procentii ilinniarsimanngitsuupput, eqqarsartaasaalu malissagaanni inuusuttut ilinniagaqarnissaat pingaaruteqarluinnarpoq.

Piniartuuneq aalisartuunerlu nunatsinni suli pingaaruteqarluinnarput politikkerillu suliassaraat inuussutissarsiutini taakkunani atukkat pitsanngorsarnissaat erseqqissarpaali inerisaani inuussutissarsiutinik ingerlatsisuusut siuttuunissaat inuussutissartiutit taakku ilusissaasa inissinniarnerani.

Ammaanermi oqalugiaatip naggataani inissaqarniarneq Kuupik Kleistip iserfigaa tassanilu politikkerit akisussaaffeqarnerat erseqqissarlugu. Ukioq 2025-mut anguniagassatut pilersaarut eqqartorpaa, tamatumalu kingorna naalakkersuisooqatigiit qqammatini 38-ni atasimanerat kingumut qiviarfigalugu.

Tamanna imatut oqaasertalerpaa.

- Nunatta oqaluttuarisaanerani pissanganarluinnartunik alloriarfeqalerpugut, alloriarfissat meeqqatsinnut taakkualu meeraannut sunniuteqartussat, taamaattumik taakkua salliutillugit eqqarsartariaqarpugutm, Kuupik Kleist oqarpoq.

- Tamanna tamatsinnut annertuumik piumasaqaatitaqarpoq. Nalunngilara qinigaaffiup naajartulernerani sukkut immikkooruteqarnerput nittarsaatissallugu ussernartorsioqqajaasartugut, isumaqarpungali innuttaasut qinigaattut tatigisaattullu suliaqartitaanitsinni suleqatigiilluta naammassisaqarsinnaanerput pingaarnerpaajusoq.

- Akaareqatigiilluta qiimallutalu ataatsimiilluarnissatsinnik kissaateqarlunga oqaatigeqqissavara Naalakkersuisut sutigut tamatigut oqaloqatigiinnissatsinnut piumassuseqaratta, Kuupik Kleist naggasiivoq.

Oqalugiaat tamaat linki ataaniittoq toorlugu atuarsinnaavat.