Qinersinermut inatsit naleqqukkunnaartoq

Danskit Kalaallit Savalimmiormiullu 150.000-it sinnerlugit amerlassuseqartut nunani allani najugaqartut pingajorarterutaannaat qinersisoqartillugu qinersisarput, aviisi Poliken taama allaaserisaqarpoq.

Qinersinermut inatsit paasiuminaappoq, tunngaviusumillu inatsisip allanngortinneqarnissaa danskit nunani allani peqatigiffiannit Danes Worldwide-mit maanna piumasarineqalerpoq.

Tunngaviusumik inatsit malillugu qinersisinnaassagaanni danskit naalagaaffiani najugaqartutut nalunaarsimasariaqarpoq. Taamaakkaluartoq ukiuni marlunni nunani allaniissimanerup kingorna Danmarkimut uteraanni qinersisoqarsinnaalluni.

Danskit naalagaaffianni innuttaassuseqartut nunani allani najugaqartut qinersisoqartillugu qinersisinnaatitaasut arlaqarput. Tassalu assersuutigalugu nunani allani ilinniagaqartut aamma aallartitatut sulisut.

Nunani avannarlerni allani qinersisinnaatitaanermut pisinnaatitaaffiit Danmarkimisulli sukannertiginngillat.

Finlandimi Sverigemilu innutaassuseqartut, nunani allaniikkaluarunilluunniit qinersisinnaatitaapput. Islandimi innutaassususeqartut,  Islandimit nunamut allamut nuunermit ukiut arfineq pingasut qaangiukkaangata qinersisinnaajunnaartarput, Norgemi ukiut qulit qaangiukkaata.

Qinersinermut inatsisip aamma tunngaviusumik inatsisip oqallisigineqarnisaa Danmarkimi partiit arlaqartut orniginartippaat.

Allanguisoqarnissaanik Socialdemokraatit isumaqataanngillat. Nunami najugaqarfigisami oqattussaaqataanerup ingerlanneqarnissaa pissusissamisoorneruvoq, Socialdemokraatini kommunalit pillugit oqaaseqartartoq, Ramsu Prehn politikenimi apersorneqarluni oqarpoq.