Qinersineq knr.gl-imi unnugu nalunaaqutaq arfineq-pingasuniit malinnaaffigiuk
Nunatsinni ullumikkut marlunngornermi qinersissaagut.
Sisamanut assigiinngitsunut qinersissaagut: Tassa Inatsisartunut, kommuninut, ilagiit sinniisaannut nunaqarfinnilu aqutsisunut.
Usimaannami, qinersinerit tallimaasussaagaluarput Tassa Pituffimmi innuttaasut siunnersuisoqatigiivinut aamma qinersisoqartussaagaluarpoq, qinersinerli tamanna inaarneqareerpoq.
Qinersinerillu knr-gl-imi unnugu nalunaaqutaq arfineqpingasuniit malinnaaffigisinnaavatit. Inatsisartunut kommunimullu qinersinerit pillugit unnuaq naallugu nutaarsiassiisassaagut. Taasinerit kisinneqarnerisa inerneri partiillu qinersinermi unnorsiornerat nutaarsiassavut atuarnerisigut malinnaaffigisinnaavatit.
KNR TV-imi unnugu nalunaaqutaq arfineq-pingasuniit aamma malinnaaffigisinnaavatit.
- Nunatsinni qinersivissat katillutik 72-iupput.
- Qinersivissat ullaakkut nalunaaqutaq qulingiluaniit unnukkut nalunaaqutaq arfineq-pingasut tungaanut ammassapput.
- Taasivissat Nuummiit nassiussat apuuffissaannut ullut unnuallu qulit iluanni tikiunneqarput.
- Ulloq qinersiffissaq sioqqullugu allakkatigut qinersisoqassasoq nunatsinni taasisinnaatitaasunut tamanut kaammattuutigineqarpoq. Coronamik nunatsinni qaammat ilivitsungajak tunillatsissimasoqanngikkaluartoq coronallu nunarsuaq tamakkerlugu tuniluunnnerata ajornartoortitsinera peqqutaalluni taamaaliortoqarpoq.
- Nunatsinni innuttaasuni taasisinnaatitaasut 41.000-t missiliorpaat.
- Inatsisartunut ilaasortanngortussatut qinikkat 31-usarput. Inatsisartunut qineqqusaartut 189-iupput.
- Kommuninut ataasiakkaani tallimaasunut qineqqusaartut katillutik 254-iupput.
Inuit Ataqatigiit Inatsisartunut apriilip ulluisa arfernanni qinersinermi siuariangaatsiartussatut isikkoqartut, nutaarsiassaqartitsiviup Sermitsiaq.ag.-p imissutaanik HS Analysep isumasiunerani erserpoq: Tassa isumasiukkat 36 procentiisa Inuit Ataqatigiit qinerniarnerarpaat, tamannalu . Tassa imaappoq, IA aqqaneq-marlunnik Inatsisartuni qinersereernermi ilaasortaatitaqalertussatut isikkoqarpoq.
AAMMA ATUARUK Isumasiuineq: IA siuariangaatsiartussatut isikkoqarpoq
Qineqqusaartut isumasiunermi inernerit naapertorlugit ima ilaasortaatitaqartigilissapput:
- Atassut: Marluk.
2018-imi apriili kingullermik qinersinermi aamma marlunnik ilaasortaatitaqalerpoq. - Demokraatit: Sisamat.
Qinersinermi kingullermi arfinilinnik ilaasortaatitaqalerput. - Inuit Ataqatigiit: Aqqaneq-marluk.
Qinersinermi kingullermi arfineq-pingasunik ilaasortaatitaqarlerput. - Naleraq: Tallimat.
Qinersinermi kingullermi sisamanik ilaasortaatitaqalerpoq. - Siumut: Arfineq-pingasut.
Qinersinermi kingullermi qulingiluanik ilaasortaatitaqarlerpoq. - Nunatta Qitornai: Soqanngilaq. Inatsisartuni ilaasortaatitaqarunnaarpoq.
Qinersinermi kingullermi ataatsimik ilaasortaatitaqalerpoq - Suleqatigiissitsisut: Soqanngilaq, Inatsisartunilu ilaasortaatitaqarunnaarlutik.
Qinersinermi kingullermi ataatsimik ilaasortaatitaqalerput.
Tusarfik: Sermitsiaq.ag.
Siumulli kinguariartussatut isikkoqarpoq. Partiimi taanna qinersinermi taasisut 23 procentiinik qinersiseqassasoq, isumasiunermi erserpoq. Tassa Siumut qulingiluanik Inatsisartuni ilaaasortaatitaqarunnaarluni arfineq-pingasuinnarnik ilaasortaatitaqalertussatut isikkoqarpoq.
AAMMA ATUARUK Ilisimatooq siulittuisoq: Isumaqatigiinngitsut naapeqatigiissapput
IA siuariartussatut Inatsisartunut qinersinnginnermi kingullerni marlunni isumasiunerni aamma isikkoqarpoq.
IA qulinik Siumullu qulingiluanik Inatsisartuni ilaasortaatitaqalerataannaasut, Sermitsiap KNR-illu Inatsisartunut kingullermik tassa 2018-imi apriilimi qinersinnginnermi isumasiuneranni erserpoq. Taamaakkaluartoq Siumut taamani qinersinermi ajugaavoq.
Inuit Ataqatigiit partiini annerpaanngussasoq, Inatsisartunut 2014-imi novembarimi qinersinnginnermi isumasiunermi aamma erserpoq. Siumulli taamani qinersinermi ajugaammat, IA partiini annerpaanngunngitsoorpoq.
Siumut 1979-imi Namminersornerullutik Oqartussaqalerneraniilli naalakkersuisuni siulittaasuutitaqartuaannangajassimavoq. Inuit Ataqatigiit naalakkersuisunut 2009-imiit 2013-imut taamaallaat siulittaasuutitaqarpoqnikuuvoq.
