Assit Qinersineq ingerlallualeruttorpoq
Kommune Kujallermi Nanortalimmi kommunimut qinersinerup siulianut sanilliullugu ukioq manna maannamut ingerlalluarneruvoq.
Qinersisinnaasut, 928-usut, 27,7 procentii qinersereerput, taakkulu 2013-imut sanilliukkaanni 3,4 procentinik amerlanerupput.
Ingerlalluaannarnissaalu naatsorsuutigigini, qinersititsisoq isumaqarpoq:
- Inuit isaaginnavipput, ajunngitsumillu ingerlavoq, Nanortalimmi katersortarfimmi Qujanartip Illuani qinersititsisoq Knud Semsen oqarpoq.
Maniitsumi kinguariartoq
Maniitsumi qinersineq ullup qeqqata siorna siulianit sukkaneroriarluni maanna arriinnerusoq, qinersivimmit paasissutissiissutigineqarpoq:
- Qinersisinnaasut 338-t nalunaaqutaq ullup qeqqanut qinersiartorput, taamaalillunilu 17,44 procentii qinersiartoreerlutik. Qinersiartorsimasut 2013-imut sanilliullugit ikinnerulaarput, Maniitsumi qinersitsitsisoq, Peter Søren Olsen, oqarpoq.
Maniitsumi inuit 1.938-t qinersisinnaapput. Taasisut 2013-imut sanilliullugit ikinnerulaarput, taamani 19,37 procentiullutik.
Nuummi qinersisartut 14,84 procentii qinersereerput, taakkulu 2013-imut sanilliullugit ikinnerulaarput, taamani 15,64 procentiugamik.
Ittoqqortoormiini pingasorarterutaat sinnerlugit qinersereerput
Ittoqqortoormiini 273-nik qinersisartoqartumi qinersineq aamma ingerlalluaqisoq, qinersititsisoq oqarpoq.
- Qinersisinnaasuni 101-it, nalunaaqutaq marlunut, qinersereerput. Tassa imaappoq qinersisinnaasut 36 procentii taasereerput, Ittoqqortoormiini qinersitisisoq, Evald Simonsen, oqarpoq.
Nunatsinnilu qinersiviit minnersaanni Qeqertarsuup avannaaniittumi Kangerlummi qinersineq eqqissisimanerusumik ingerlavoq.
Nalunaaquttap akunnerani siullermi inuit tallimat taasiartoreersimagaluartut, qinersisartut sinneri qulingiluaasut taasiartorumaartut, qinersititsisut isumalluarput.
- Tamakkikkajukkamik qinersineqaraangat, aamma neriuppunga tamakkissasut, Qeqertarsuup nunaqarfiani Kangerlummi qinersititsisoq, Eleonora Lukassen, oqarpoq.
