Qineqqusaarnermi oqallilluarnissaq IAp kaammattuutigaa
Inatsisartunut kommunalbestyrelsenullu qinersinerit 2013-mi oqallinneq immersugaatsiartussaavaat. Partiillumi qineqqusaarneq aallartinissalereerpaat.
- 2013-imi qinersinissaq qilanaaraarput. Atuuttussaannartut isumaqarfigeqqajaaneqartartoq qinersisaratta tamanna aamma demokratip erserneraa. Neriuutigeqaarput qineqqusaarneq pikkunarluni isumatuumik saqqummiussuiffiussasoq. Neriuppugut qineqqusaarnermi inuttarsiuineq pinnagu siunissami anguniagassatut isummat pingaarnerpaajutinneqassasut. Qinersinermi naammassippat ulluinnaat atuleqqittussaavagut, Aqqaluaq B. Egede aamma Naaja Nathanielsen IA sinnerlugu ukiortaami oqaaseqaamminni allapput.
- Qinersinerit qanoq inerneri apeqqutaatinnagu Inuit Ataqatigiit sulinerput nangissavarput Namminersorneq pillugu isumaqatigiissutip periarfissatut ammaassai timitalersorlugit. Suliassatta aamma ilagaat innuttaasut inuuniarnermi atukkamikkut periarfissamikkut assigiinngisinneqannginnissaat. Tamatta sunniuteqaqataanissatsinnut pisariaqartinneqarpugut. Taamaattumik innuttaqa-titsinnut ima kaammattuuteqarusuppugut: Nunatta siunissaa pillugu isummersoqa-tigiinnerput 2012-imisut pimoorullugu tiguartisimalluta 2013-imi nanginniartigu, Aqqaluaq B. Egede aamma Naaja Nathanielsen allapput.
Nunatsinni inuussutissarsiornermi allannguinerit annertuut pigaluttualerput aatsitassarsiorneq annertusaaffigineqalermat. Taamaakkaluartoq inuiaqatigiit aaqqinniagassaqarput nukippassuit atorlugit iluarsiniagassanik.
- Ajornartorsiutit ilungersunarluinnartut anigorniagassatta qeqqanniippugut, peqqarniisernerit, nakuusernerit, kinguaassiuutitigut innimiilliornerit aamma imigassamik ikiaroornartunillu atornerluinerit. Pissutsillu piviusut ilagaat innuttaqativut amerlammata inuuniarnermikkut ilungersunartorsiortut ilaatigut naammaginartumik ilinniakkatigut angusaqarsimannginnamik, ineqarniarnikkut ajornartorsiuteqaramik qanitaminnilu suliffisaqannginnamik.
- Inuit Ataqatigiit isumaqanngilagut pissutsit atuuttut allanngortinnaveersaaginnarnerisigut tamakku anigorsinnaagivut. Pissutsit ilungersunartunut tunngaviusut allanngortittariaqarpavut taamaaliornikkut periarfissat nutaat pilersikkumallugit. Ataasiakkaarlutali qunusuisaarluta allan-nguiumalluta aalajangersinnaanerput naammanngilaq, aammali innuttaasut qinigaasut ajornartorsiutit atuuttut isummersorfiginissaat qanorlu anigorniarneqarsinnaaneri pilersaaruteqarfigissallugit sapiissuseqartariaqarpugut, IA-kkormiut allapput.