Qimuttunik qimmillit peqatigiiffii: Qimmit nakorsassaaleqimmata toquinnartarpagut

Uumasut Ilulissani nakorsaarummatali ukioq ilivitsoq qaangiuppoq. Tamanna qimuttunik qimmilippassuarnut kingunerluppoq.

- Ikilersimasut, nersutit nakorsaannit qanimut nakorsarneqarsinnaagaluit, immaqa inersimasunngortut, ukiuni arlalini atorsinnaasaraluagut, ikiornissaqartinnagit ilaanni toquinnartarpagut, Apollo Mathiassen, Saattuni Suloraq-84-mi siulittaasoq KNR-mut oqarpoq.

Saattuniinnaq taama pisoqartalinngilaq. Aamma Ilulissani tamanna takornartaajunnaarpoq.

- Tassa ukiormannaannaq arlallit taamaalerpasipput. Ataasiinnaanngitsoq paasivara toquinnartariaqartoq, Minik Olsvig Svendsen, Ilulissani Qimussersaq 71-p siulittaasua KNR-mut oqarpoq.

Nakorsaatinik pissarsisinnaanngitsut

Aalisarnermut piniarnermullu naalakkersuisoqarfiup pisortaata, Jørgen Isak Olsenip, qimmillit uumasuutiminnut tunngatillugu ikiorneqarusuttut kommunimut saaffiginnittarnissaat KNR-mut siusinnerusukkut oqaatigaa.

Saattunili peqatigiiffiup siulittaasuata oqarnera naapertorlugu kommunip ikiuussinnaanera killilerujussuuvoq. Kommunemimi qumaajaatinik peqallatuaraagat pissarsilaarsinnaasarlutik oqarpoq. Kisianni:

- Pensilinat, assersuutigalugu nakorsarneranut tunngasunik pissarsisinnaanngilagut, Apollo Mathiassen oqarpoq.

AAMMA ATUARUK Ilulissani uumasunut nakorsaarusuttoqanngitsoq

Tamanna Avannaata Kommuniani qimmilerisut ilaata, Ilulissani najugallip uppernarsarpaa.

Taassuma oqarnera naapertorlugu uumasut Ilulissani siorna nakorsaarummatali qimminut nakorsaatit pissarsiassaajunnaarput.

- Taamaattunik nioqquteqarsinnaasumik Avannaata Kommuniani pissarsivissaarunnikuugatta. Taamaattumik massakkut tamakku qumaajaatit, pensilinat naartunaveersaatit allallu nakorsaatit qimminut atorneqartartut pissarsiassaajunnaarnikuugamik, Ilannguaq Hansen oqarpoq.

Naatsorsueqqissaartarfiup kisitsisaatai 2020-meersut naapertorlugit, nunatta kitaani qimuttunik qimmeqarfiusuni qimmit 12.170-pput.