Ilulissani uumasunut nakorsaarusuttoqanngitsoq
Ilulissani uumasut nakorsaata allaffiata matua piffissami sivitsortumi paarnaaqqavoq. Tamanna atorfiup inuttassaarunneranik peqquteqarpoq.
- Sulisorisarput soraartinnaguli sulisussarsiortaraluarluta suli iluatsinngilarput. Maannakkut ukiup sinnilerpaa taamatut inissisimalluta.
Aalisarnermut piniarnermullu naalakkersuisoqarfiup pisortaa, Jørgen Isak Olsen KNR-mut oqarpoq.
Uumasut nakorsaqarfiat taassuma naalakkersuisoqarfimmit pisortaaffianit aqunneqarpoq.
Uumasut nakorsaannik Ilulissani najugalimmik atorfinititsiniarneq Namminersorlutik Oqartussanut ima ilungersunartigaaq, allaat atorfiup pingajussaannik inuttassarsiornissaa maannakkut aalajangiunneqarluni.
Ilulissanili atorfik Nuummut nuunneqanngitsoq pisortap erseqqissaassutigaa.
Taassuma Nuummi uumasut nakorsaqarfianni atorfillit Nuummiiginnarnissaminnik kissaateqarnerarpai.
Ukiumut sisamariarluni nakorsaqartassasoq
Taamaattumik Ilulissani sulisussaaleqinerminnut aaqqiissutaagallartumik nassaarsimapput.
Nuummi uumasut nakorsaat ukiumut sisamariarlutik piffissap ilaani Ilulissiartarnnissaannik aaqqiissimapput.
- Qaammatit pingasut ingerlanerini pinngitsooratik taavaniittarnissaat aalajangiunnikuuarput, Jørgen Isak Olsen oqarpoq.
Uumasulli nakorsaat qaammatit pingasut piffissaq tamakkertassanngimmassuk, piffissap ilaa uumasut nakorsaqartassanngilaq.
Pisortammi oqarnera naapertorlugu Nuummi atorfillit ulapputissaqaqaat.
Suli nakorsiussisoqarsinnaasoq
Avannaanili soorlu qimminik uumasuutillit napparsimasuulerunik saaffissaqartuassapput.
Uumasummi, assersuutigalugu Ilulissani qimmit, ikiorserneqartariaqarpata piginnittoq kommunimut aallaqqaammut ikiortissarsiussaaq.
- Kommunimi qimmilerisunik saaffiginninnikkut, taava taassuma ikiorsiisinnaanera killeqarpat, uumasut nakorsaqarfianut saaffiginnittoqarsinnaavoq, tassuunatigullu eqqartueqatigiilluni qanoq pisoqarnissaanik, Jørgen Isak Olsen oqarpoq.
Naatsorsueqqissaartarfiup kisitsisaatai 2020-meersut naapertorlugit, nunatta kitaani qimmeqarfiusuni qimmit 12.170-pput.
