Qimussertoq tammaaneqartoq illuaqqami nassaarineqartoq
Angut 40-t sinnerlugit ukioqartoq Tasiilami maqaasineqartutut ippassaq nalunaarutigineqarpoq.
Angut qimusserluni ippassaq siusinnerusukkut aallarmat kingullermik takuneqarpoq – taamaammat SAR-imik ujaasineq annertooq aallartinneqarluni.
Tamannalu iluatsilluartumik inerneqarpoq – angut nalunaaqutaq 10.30-nngunngitsiartoq ujaasiffiusumi nassaarineqarluni.
Kalaallit Nunaanni Politiini ujaasinermi aqutsisoq, Malik Olesen KNR-imut oqarpoq:
- Sukumiinerusut suli ilisimanngilagut. Angut angerlaqqippat killisiorneqassaaq, Malik Olesen oqarpoq.
Taassuma angut illuaqqamut sooq oqqiffissarsiorsimanera ilisimanngilaa, politiilli oqarnerat naapertorlugu sumiiffiulli aqqutaa Slush Icetut issimavoq.
Issittumi Sakkutooqarfik aamma Kalaallit Nunaanni Politiit SAR-imik ujaasinermik aallartitsisuupput. Timmisartoq Challenger silaannakkut ujaasivoq, politiit qamuteralannik ujaasipput, namminerlu kajumissutsiminnik ujaaseqataasut 13-it qamuteralannik aamma ujaaseqataallutik.
Politiit angummik illuaqqami nassaartuupput.
Angut nunaqarfimmut Tasiilap avannaaniittumut Tiilerilaamut sapaammi nalunaaqutaq unnukkut arfineq-pingasut missaanni tikittussaagaluarpoq, angulli tikinnanilu tutsaqanngilaq. Taamaammat qanigisaasut angummik maqaasisaqarlutik nalunaaruteqarput.
Tasiilami ullut marluk ingerlanerinnaani aappassaa SAR-imik ujaasinermik aallartitsisoqarpoq. Angutit marluk qamuteralattut ingerlariarneq ajuleqqasut ikiorneqarnissaminnik arfininngormat pisariaqartitsipput. Angutit sikumi nikinnaveersimapput.