Qimmeq ilumittoq naammattunik nerukkarneqaneq-ajornini pissutigalugu toqusimasoq

Qimmeq naammattunik nerukkarneqarneq-ajornini pissutigalugu toqusimasoq Ilulissani marlunngormat siumorneqarpoq. Qimmeq toqungasoq qimmiaqqanik arfinilinnik ilumittoq, sapaatip-akunnera qaangiutsinnagu sarlialereersimassagaluarpoq.
 
- Qimmeq iluminnermi nalaani naammattunik nerukkarneqarneq ajorami toqusimavoq. Ammarterlugu misissorakku takusinnaavara tingui perlilertarsimanerminit sussaajunnaarsimasut, taakkuuppullu toqqutigisai, Sanne Eline Wennerberg oqarpoq.
 
Qimmiutilik qimmimik ilumittumik perlilertitsisimanini pissutigalugu politiinut suliassanngortinneqassaaq.

Uummannami politiit Uummannap nunaqarfiisa ilaanni qimmiutillit ilaat aamma saaffigisariaqarsimavaat, qimmiutilik taanna qimmiutiminik paarsinerlussimanera pissutigalugu. Taamatuttaarlu Qasigiannguani taama pisoqarsimasoq, Uumasut nakorsaata oqaatigaa.
 
Uumasut nakorsaat: Nuannaarutissaanngilaq
Uumasut nakorsaata nalileruminaatsippaa uumasunik naalliutsitsisarnerit amerleriarsimanersut ikileriarsimasulluunniit, suliassanngortinneqartartut tamarmik nalunaarsorneqarneq-ajormata, naalliutsitsisulluunniit tamarmik naammattoorneqarneq-ajormata.
 
- Qimmiutillit qimmiminnik nerisitsineq-ajortut tassaakkajupput piniariarlutik aallarsimasut, angalaartut sunngiffeqarlutilluunniit peqanngitsut.
 
- Taama pisoqartarnera nuannaarutissaanngilaq, tamatsinnut tusaamanerlutaalersarmat, qimmiminnillu paarsilluartunut aamma tutsinneqartarluni.  Ukiulerpoq issittalertussaallunilu. Qimmit saloreeqisut meqqorluttullu issi sapersaatigissaqaat. Issilerpat qimminut saloqisunut imaannaanngitsuussaaq, orsoqannginnamik issimut akiuussutissaminnik.

- Qimmeqassagaanni, taakkununnga ullut tamaasa akisussaassuseqartoqartariaqarpoq, Sanne Eline Wennerberg taama erseqqissaavoq.