Qimarnguiit akileraarutinit 1 millionit koruunit missaannik tapiiffigineqarput. Kisianni ammanikuuppat?
Qimarnguiit imminnut ingerlattut Kommune Kujallermi marluupput, kisianni soorlu pappiaraannakkut.
Qimarnguiit marluk, siulleq Qaqortumiittoq aappaalu Narsamittoq inatsisitigut pisussaaffitik malillugit sulerisimanerminnik uppernarsaammik nassitsisimanngillat imaluunniit ingerlatsinissamut kommunimut qinnuteqarsimallutik.
Taamaattumillu Kommune Kujalliup qimarnguinnik suleqateqarnini atorunnaarsippaa. Kommunalbestyrelsip ukioq manna juuni 19-ani ataatsimiinnermini ullormut oqaluuserisaani tamanna atuarneqarsinnaavoq.
Tassani allassimavoq ukiuni 2021-mi aamma 2022-mi qimarnguinnit ukiumut nalunaarusianik kommuni tigusaqarsimanngitsoq.
Apeqqutit pingaarutillit arlallit qaffapput: Qimarnguik 2020-mili ukiumoortumik nalunaarusiorsimavoq, soormiuna taava kommunip suleqatigiinneq aatsaat atorunnaarsikkaa? Arnat angutillu nakuuserfigineqarsimasut Kommune Kujallermi taava ikiortissarsiorfissaqarsimanngillat?
Taavalu angutit arnallu persuttartissimasut Kommune Kujallermi qimarngusinnaasimanngillat?
Apeqqummut kingullermut kommunip isumaginninnermut pisortaa Nielsine Petersen erseqqippallaanngitsumik akivoq:
- Paasisakka malillgit qimarnguiit matoqqasimanngillat maanna aamma ammapput.
Akissutissaqanngilaq
Isumaginninnermut ataatsimiititaliap siulitaasua Sofia Olesen (IA) aamma erseqqissumik akissutissaqanngilaq. Akerlianik.angutit pingaartumillu arnat meerallit persuttartissimasut ukiuni taakkunani qimarngusinnaasimanersut naluaa.
-Naatsorsuutinik tigusaqarnikuunnginnatta apeqqut akisinnaanngilarput, Sofia Olesen oqarpoq.
isumaginninnermut ataatsimiititaliami siulittaasuullutit qanoq nalussaviuk?
- Misissornikuunngilara, kisianni juulip qeqqani matuersaatit (qimarnguinnit, aaqq.) tiguagut, nassuiaavoq.
Taasuuma ilanngullugu oqaatigaa kommunip ilaqutariinnut sullissiviata ingerlatileraa.
Qimarnguiit tatigigaluarpaat
Qimarnguiit taakku marluk ingerlanneqarneranit ukiumoortumik nalunaarutinik naatsorsuutinillu tunniussisoqarsimanngikkaluartoq 2022-mi Kommune Kujalliup naatsorsuutai malillugit qimarnguiit taakku marluk ingerlanneranut 900.000 koruuninit tapiisoqarpoq.
2020-p kingorna ukiumoortumik nalunaarusianik kommune qimarnguinnit tigusaqarsimanngippat, sooq taava kommunip suleqatigiinneq aatsaat maanna atorunnaarsippaa?
- Soorunami tatigineqarsimapput upperineqarsimallutillu. Kisianni taava erserpoq piumasaqaatitsinnik tunniussisinnaasimanngitsut, Sofia Olesen oqarpoq.
Tamanna kommunimit kukkunerua?
- Kukkunerusunersoq kukkunerunnginnersorluunniit oqaatigineqarsinnanngilaq. Naatsorsuutinik tunniussinissaat upperisimavarput utaqqisimallugulu, taamaaliorsinnanngimmatalu suleqatigiinneq unitsipparput. Tassa oqaatigisinnaasatuara.
Qaqortumi qimarnguimmi siulittaasoq arlaleriarluta KNR-imiit attaveqarfiginiaraluarparput iluatsinngitsumik, Narsami qimarnguimmi siulittaasuusimasoq Peter Larsen aamma attavigaarput, pisoq pillugu taanna oqaaseqarusunngilaq.
