Naggueqatigiit Inuit Montrealimi artorsartut

Naggueqatigiit Inuit angerlarsimaffeqanngitsut Montrealimi 200-it missaanniipput. Ajornartorsiorput, corona virusertoqarneranili suli ajornartorsiornerulerlutik.

Angerlarsimaffeqanngitsunut qimarnguiit arlallit corona virusertoqarnera peqqutaalluni matoqqasariaqarsimasut, universitetimi ilinniartoq, kajumissutsiminillu qimarnguinni sulisoq, Emily Hoppe, KNR-imut oqaluttuarpoq.

Qimarnguiit corona virusip akiorniarneranut malittarisassat naammassisinnaannginnamikkit sulisunilluunniit amigaateqaramik matoqqapput.

Kitty Kakkinerk arnanut toqusunut pingasunut ilaavoq. Taanna qimarnguimmi inissaqannginnami biilit unittarfianni sinissimavoq.

Unnukkut nakuuserfigineqarpoq arpallunilu qimaanermini lastbilimut aportinnini toqqutigaa. Arnallu allat marluk angallannikkut ajutoortoqarnerani aamma toqupput.

Taakkua arnat toqqaannanngikkaluamik corona virusertitsipput. Allarpassuilli aamma tunillatsissimasinnaapput naak kisitsisini pisortatigoortuni ilaanngikkaluarlutik.

Misissuutit immikkuullarissut

Misissuutinik immikkut ittunik naggueqatigiinnut inunnut nunallu inoqqaavinut allanut Montrealimiittunut pilersitsisoqarpoq. Aqqaniliinnaalli qaammatip kingulliup iluani misissortissimapput.

Angerlarsimaffeqanngitsut assamik asannissaannut, imminnut qanillivallaannginnissaminnut peqqussutinullu malinninnissaminnut periarfissarpassuaqanngillat.

- Aamma taakkua coronamut tunillatsissimanginnermut misissuinerup inernerisa tigunissaannut najukkamik adresseqanngillat, Emily Hoppe oqarpoq.

Covid-19 naggueqatigiinnut Inunnut artornarpoq.