Qimaasut 300-nit amerlanerusut Kanariskit qeqertaasa avataanni maqaasineqartut
Umiarsuarni periarfeerussani pingasuusuni ilaasut Senegalimiit aallaramilli ilaquttaminnut tutsaqaqqissimanngillat.
Umiarsuaq alla qimaasunik ilaasoqarluni Europaliartilluni qaammatip siuliata qiteqqunnerani umiiareersorlu, qimaasorpassuit allat maqaasineqartutut maanna nalunaarutigineqarput.
Allattoq Ritzau
juulip 10-at 2023 09:18
Nutserisoq Ivik Kristiansen
Spaniami annaassiniartartut umiarsuarmik Afrikamit qimaasunit ikinnerpaamik 200-nit ilaaffigineqartumik Kanariskit qeqertaasa (De Kanariske Øer, aaqq.)) imartaanni ujaasipput.
Umiarsuaq sapaatit akunneri marlungajaat matuma siorna periarfeerunneqarpoq, umiarsuarmullu ilaasut ilarpassui inuit pisinnaatitaaffii pillugit Spaniami suliniaqatigiiffik Caminando Fronteres naapertorlugu meeraapput.
Nutaarsiassaqartitsivik BBC taama allappoq.
Nutaarsiassaqartitsivik Reuters naapertorlugu aamma umiarsuit marluk allat katillugit 100-nit amerlanerusunit ilaaffigineqartut sapaatit akunneri marluk matuma siorna periarfeerunneqarput.
Tassalu qimaasut 300-nit amerlanerusut Kanariskit qeqertaasa avataanni maqaasineqarput.
