NAKKUTILLIINEQ Qeqqata sukateriniartoq
Ilaqutariinnermut ataatsimiititaliami siulittaasoq, Hans Frederik Olsen Nakkutilliisoqarfiup aasaq pulaarneranit qisuariarnerit pillugit taama oqarpoq.
- Kinguneqartussamik isumaliulissalluta paasivarput. Tamanna eqeersimaartitsineruvoq, Hans Frederik Olsen KNR-imut oqarpoq.
Ilaqutariinnermut ataatsimiititaliap januarimi ataatsimiikkami nalunaarusiaq oqaluuserivaa, nakkutilliisullu isornartorsiuitaat immikkoortut qulingiluat akissuteqarfigalugit.
Kommunip meeqqat inuusuttullu pillugu nalunaaruteqarnerit ukkatarinerulissagai taamaasillunilu nalunaarutiginninnerit tamarmik misissorneqartalissasut akissuteqaatini ilaatigut takuneqarsinnaavoq.
Taakku saniatigut kommunip meeqqanut inuusuttunullu suliat suli suliarineqartut iluarsaassiffigissavai, suliamillu isumaginnittut piginnaaneqarnerulersinniarlugit sukumiisumik pikkorissarneqarnissaat pilersaarutaavoq.
Kiisalu Qeqqata Kommunia politiillu suleqatigiillualernissaat pilersaarutaavoq. Suleriusissaq ileqqussamik isumaqatigiissuteqarnikkut aallartisarneqartoq, kommune paasissutissiivoq.