Sisimiuni meeqqanik inuusuttunillu sullissineq isornartorsiorneqartoq

Sisimiuni meeqqat inuusuttullu pillugit suliat nakkulliisoqatigiit nalunaarusiaanni nalinginnaasumik "naammaginanngilluinnartutut" oqaatigineqarput.

Piffissaq qaninnerusoq eqqarsaatigalugu sulisoqarpoq, meeqqamullu pitsaanerusoq pinnagu aningaasartuutikillisaanissamik kissaateqarneq aallaavigalugu taama ingerlatsisoqarpasittoq, Namminersorlutik Oqartussat nakkutilliisoqatigiivi nalunaarusiaminni, KNR-ip allagaatinik takunnikkumalluni noqqaassuteqarnermi kingorna pissarsiarisimasaani, taama allapput.

Qeqqata Kommuniata isumaginninnerup iluani akisussaaffinnik piginnaasanillu sulisut akornanni agguataariffiusumik aaqqissuussaanermut pilersaarusiorsimanera Nakkutilliisoqatigiit pitsaasutut oqaatigaat.

Qeqqata Kommuniani ilaqutariinnut sulissiviit isumaginnittoqarfimmut qanoq atassuteqarnersut nakkutilliisoqatigiit nalornissutigaat. Innuttaasunik peqqissaanerit oqaloqateqartarnerillu sullissivinnit isumagineqarput.

Nakkutilliisoqatigiit isumaqarput isumaginnittoqarfiup ilaqutariinnillu sullissiviit qanoq  piginnaatitaaffeqarnerat erseqqissumik nassuiarneqartariaqartoq.

AAMMA ATUARUK Nakkutilliisoqatigiit: Qaasuitsup Kommuniani assigiinngitsupilussuarmik ingerlatsisoqarpoq

Maniitsumi Sisimiunilu meeqqanik sumiginnaanerit pillugit suliat arlaqarput. Maniitsumili isumaginnittoqarfiup aaqqissuuteqqineratigut sulianut nutaajunerusunut tunngatillugu illersorneqarsinnaasumik sulianik ingerlatsisoqalernissaa Nakkutilliisoqatigiit neriuuteqarfigaat.

Sulialli pisoqqat, annertuumik amigaateqakkajuttut, iluarsaanneqarnissaat pisariaqarpoq. Assersuutigalugu suliat qarasaasiatigut allattorneqartarsimanngillat iliuusissallu pillugit pilersaarusiortoqannginnera takornartaanani.

Sisimiunut tunngatillugu meeqqat angerlartinneqarsimasut pillugit suliat Nakkutilliisoqatigiit immikkut eqqaavaat. Meeqqat angerlarsimaffiup avataanut inissinneqarnermik kingorna ilaquttaminnut angerlartinneqarsimasut matumani pineqarput.

Meeqqat angerlartinneqartarnerinik sulianik ingerlatsineq naammaginanngitsoq     Nakkutilliisoqatigiinnit oqaatigineqarpoq.