Qeqertarsuup tunua sinersortaaserneqassanngilaq

Qasigiannguani Qeqertarsuarmi Kangaatsiamilu decembarimi januaarimilu umiarsuaaqqamik sinersortaasiinissamut Naalakkersuisut pilersaaruteqarnersut, Inatsisartuni ilaasortap Atassummeersup Kristian Jeremiassenip, Inatsisartut suleriaasianni § 36 naapertorlugu novembarip 22-ianni apeqquteqaataa, Attaveqarnermut Naalakkersuisup Jørgen Wæver Johansenip akivaa.

"Naagga". Attaveqarnermut Naalakkersuisup Jørgen Wæver Johansen taama akivoq, erseqqissaatigaalugu, siorna aningaasanut inatsisip akuersissutigineqarnerani ukiumut 95 million koruunit missaanni angallannermiit ilinniartitaanermut nuunneqarnissaat aamma Atassummit akuerineqarsimasoq. Angallannikkut sipaarniarneq, tamatumalu kingunerisaanik, Qeqertarsuup tunuani aasaannakkut ukiuuneranilu silaannakkut angallassisarnissat kisimik tapiiffigineqartalersimanerisa Inatsisartunit aamma akuerineqarsimanerat erseqqissaatigaa.

Kristian Jeremiassen akissutiseqqammersoq allappoq timmisartunut maanna utaqqisoqalereermat juullisioriarniat Qasigiannguanut, Qeqertarsuarmut, Kangaatsiamullu qanoq ilillutik anngunnissaat assut nalorninartoq.

-Umiarsuaaqqat unereerput, angalaniarnerlu akisoqaaq, ilinniartut qanoq ilillutik tikissinnaappat? Akissaatikitsut qanoq ilillutik ilaquttatik juullimi ilagisinnaavaat? Kristian Jeremiassen apereqqippoq.