Qeqertarsuarmi ammoniakimik aniasoortoqartoq
![](/sites/default/files/styles/image_934x467/public/article_images/royal_greenland_0.jpg?itok=gkPoeONf)
Ammoniakimik aniasoorneq pivoq Royal Greenlandip Qeqertarsuarmi fabrikkiani sapaatip akunnerani kingullermi sisamanngornermi ualikkut. Unnukkullu nakkutigineqalerluni, Royal Greenland nittartakkamini taama allaaserisaqarpoq.
Nioqqutissiat naammasseriikkat qanoq annertutigisumik ajoquserneqarsimanersut suli paasineqanngilaq.
Ajutoorneq pivoq aalisakkanik qerititerutip pladefryserip sigginneratigut tamatumalu kingunerisaanik ammoniakimik aniasoortoqarluni, Qeqertarsuarmi Royal Greenlandip tunisassiorfiani tunisinermi tunisassiornermilu ingerlatsisoq Karl Julius Broberg oqarpoq.
Taassuma ilanngullugu nalunaarutigaa, nioqqutissiat naammasseriikkat tonsinik qulinik sinneqartut tassalu Saarulliit, qalerallit, qeeqqat aammalu saattuat iginneqartariaqarsimasut
- Aniasoorneq qatserisartut atortorissaarutaannik attartorluta mekanikerit tunisassiorfimmi ajutoorfiusumut iserlutik pladefryserip siggiffia iluarsaappaat, Karl Julius Broberg oqarpoq.
- Pladefryserimi amoniakip aniaffigisaa maanna siminneqareerpoq aammalu tunisassiornermi atortut tamarmik salinneqareermata tunisassiorneq aallarteqqippoq, Karl julius Broberg oqarpoq.
Royal Greenland nittartakkamini nalunaarutigaa, Saattuat 1678 kiilunik annertussusillit maanna aserorterneqarlutik iginneqareersut aalisakkalli kasiilikkat tassalu qalerallit saarullliit qeeqqallu iginneqarnissaasa tungaanut isumannaatsumi immikkoortillugit inissinneqartut.