Qeqertarsuarmi akunnittarfik allanit pigineqalersoq
Taamaattoqarmat ilaatigut Hotel Disko Hotel Disko Islandimik taaguuteqalerpoq. Piginnittuusimasut Jens Sallingip Augusta Sallingillu takornarialerinermik suliffeqarfitik sivisuumik tuniniarpaat, Topas Travelilu maanna piginnittuulermat maanna iluatsillugu.
- Ingerlateqqinnissaanut akuerisaanerput tulluusimaarutigisorujussuuarput. Ukiorpassuarni nuannarineqartupilussuuvoq, ingerlalluarneranillu nagitsisinnaaniassagatta, suliarineqartarsimasut ingerlateqqikkusuppagut, Topas Groupip piginnittua, Jørgen Nielsen oqarpoq.
Taassuma pisaamini periarfissarpassuaqarsoraa.
- Arfernik takornariartitsinerorusuppugut. Arferit assigiinngitsorpassuummata, arfernik takornariartitsinermi periarfissarpassuaqarsoraarput, Jørgen Nielsen oqarpoq.
Tamatuma saniatigut Uunartuarsuup Sermiani illuaqqap ineriartortinnissaa, pisuttuarnernik neqerooruteqarnerulerneq sumiiffimmilu sammisassaqartitsinernik suli suliaqarneruneq pilersaarutaapput.
- Aamma heliskiingernermi suli suliaqqissinnaasatsinnik periarfissaqarpoq, Jørgen Nielsen oqaerpoq.
Ukiorli manna allannguerujussuartoqarnavianngilaq. Suliffeqarfimmi iluamik aallartisaqqaassasoq, Jørgen Nielsen ilisimatitsivoq.
Topas Travel, Hotel Icefiordimik piginnittuusoq, Lyngmark Toursimik Hotel Diskomillu unnuinernut, qimussertitsinernut, pisuttuartitsinernut arfernerlu takornariartitsinernut ukiorpassuarni suleqateqarpoq.