Qeqertap eqqaani nanoq takuneqartoq mianersoqqussutaasoq
Nanoq Avannaata Kommuniani Qeqertap eqqaani Ikorfanni ippassaq pingasunngornermi takuneqarpoq.
Aalisarnermut Piniarnermullu Naalakkersuisoqarfik tusagassiorfinnut pingasunngornermi ualikkut taama nalunaaruteqarpoq.
Aalisartut piniartullu allallu innuttaasut Ikorfat eqqaanni aalisarfinniittut piniartarfinniittullu tusagassiorfinnut nalunaarummi mianersoqquneqarput.
”Nannut ajornartorsiutaasut” pillugit qanoq iliortoqarnissaannik ilitsersuut taassuma saniatigut innersuussutigineqarpoq.
Nannut piffissami kingullermi ajornartorsiutaasimapput, inuit najugaqarfiinukartarmata, naak siusinnerusukkut qimaatinneqarsimagaluarlutik.
Nannut taamaalinermi inuussutissarsiutigalugu piniartunit akuersissutilimmit aallaaneqarsinnaapput.
Nannut ajornartoornermi pisariaqassappat aamma aallaaneqarsinnaapput, soorlu aamma inuit inuunerannik navianartorsiortitsissappata aallaaneqarsinnaasut.
Arlaannik pisoqassappat oqarasuaat 55 33 42 saaffigineqarsinnaasoq Aalisarnermut Piniarnermullu Naalakkersuisoqarfiup aamma nalunaarutigaa.
Nanoq Ikorfanni takuneqartoq ajornartorsiutaasuunersoq KNR-imit apeqqutigaarput, akissutisinatali.
