Politiit ullormut nalunaarutaat: Inuit marluk ajunaartut nassaarineqartut

Kalaallit Nunaanni Politiit umiatsiaq Poca umiiaqqasoq pillugu kalerrinneqareersullu angutit marluk, 44-nik 47-nillu ukiullit toqungasut sapaammi ullaap tungaani nassaarineqarput.

- Iluliaminermut aporsimanissaat ilimagaarput, tamanna eqqoriaanerinnaavoq, qanorpiarlu pisoqarsimanersoq oqaatigissallugu siusippallaarpoq, Kalaallit Nunaanni Politiit pigaartuisa pisortaat Jeppe Andsager oqarpoq.

Angutit toqungasut marluk ilaqutaat ilisimatinneqareerput, ajutoortoqarsimanissaalu ilimanarpoq, pigaartut pisortaat tusagassiorfinnut nalunaarummi oqarpoq.

Sumiiffinni arlalinni ikuallattoqartoq

Aasianni napparsimmaviup eqqaani sapaammi unnukkut ikuallattoqartoq, pigaartut pisortaata oqaluttuaraa.

- Ikuallanneq allamiit pisumik aallaaveqarpoq, piaraalunilu ikuallatsitsisoqarsimanersoq ajutoornikkulluunniit ikuallattoqarnersoq misissuleruttorparput, Jeppe Andsager oqarpoq.

Napparsimmaviup eqqaani illumi naatitsivimmi ikuallattoqalersimavoq, inunnillu ajoqusertoqarnani. Ilaqutariilli ataatsit allamik inissarsisinneqartariaqarlutik, pigaartut pisortaat ilisimatitsivoq.

Paamiuni qatserisartut ikuallannermut aamma ornigupput.

- Qanoq pisoqarsimanersoq oqaatigissallugu siusippallaarpoq, misissuileruttorpugummi, Jeppe Andsager oqarpoq.

Paamiuni ikuallattoqarnerani aamma ajoqusertoqanngitsoq taassuma oqaatigaa.

Inuusuttut tallimat biilit aallarukkaat

Nuummi inuusuttut tallimat biilit aallaruppaat quillu ilaannut aporlutik. Politiit tamanna pillugu ataasinngornermi ullaassakkut nalunaaqutaq sisamanut qiteqqussimatsiaannartoq nalunaarfigineqarput.

- Inuusuttut tallimat 15-it 16-illu akornanni ukiullit matumani pineqarput. Taakkunannga sisamat kinaassusersineqarput, ataaserli qimaalluni, pigaartut pisortaat oqarpoq.

Sisamat sumiiffimmi kinaassusersineqartut akornanni ataaseq tigummigallagaavoq, kingulliulli kinaassusaa suli ilisimaneqanngilaq.