Missingersuutit siulliit: Qeqertaliup nunaqarfiini innuttaasumut ataatsimut 1000 koruunit

Avannaani kommunissami – Kommune Qeqertalimmi – missingersuutit siulliit ikaarsaariarnermut ataatsimiititaliamit isumaqatigiissuteqarfigineqarlutik akuerineqarput.
Assi © : KNR
novembarip 28-at 2017 15:39
Nutserisoq Connie Fontain

Innuttaasut kommunimut akileraarut allanngorani, 28 procentiuinnarnissaa kommunimillu ikiorsiissutit ullumikkutulli iinnarnissaat naatsorsuutigisinnaavaat.

Nunaqarfinni innuttaasunit ataasiakkaanit atorneqarsinnaasut innuttaasunut ataatsimut 1.000 koruuniussaaq.

Kommune Qeqertalik ingerlatsinermut sanaartukkanullu aningaasartuutinut 544 millionit koruuninik missingersuuteqarpoq, isertitassallu 560 millionit koruunit taamaalilluni sinneqartoorutissat 16 millionit koruuningajaat sinneqartoorutigineqarnissaat missingersuusiorneqarpoq.

AAMMA ATUARUK Qeqertalimmi atorfinni amerlanerpaamik 50-iusussani aqqanillit suli inuttalerneqanngitsut

Ikaarsaariarnermulli ataatsimiititaliap Qaasuitsup Kommunianit aningaasanik karsimut qassinik tuniussaqarfigineqarsinnaanera suli nalugamiuk missingersuutit nalorninartoqarput. Tamanna ataatsimiititaliap siulittaasuata, Ane Hansenip tusagassiutinut nalunaarummi erseqqissarpaa.

Taamaammat Kommune Qeqertalimmi aningaasaqarneq nalilersorluarneqassasoq, Ane Hansenip kalerriutigaa.