Qassiarsummi imermik qalatsitseqqaaqqusineq ukiut tallimanngullartullu atorunnaartoq
Qassiarsummiut ukiuni tallimani imermik qalatsitsisareerlutik qalatitsisarunnaassapput.
Qassiarsummi imeq bakteeriaqarunnaarmat imermik qalatsitseqqaaqqusineq atorunnaarpoq. Taamaalilluni ukiuni tallimani imermik qalatitseqqaaqqusisarneq atorunnaarsinneqarpoq. Tamanna innuttaasut nuannaarutigaat:
- Ila ila, tassa nuannaarutigeqaarput. Aamma naalaaruluuginnarluni pitsaatiginngimmat, Qassiarsummiu Frederik, Nukassi, Frederiksen taama oqarpoq.
AAMMA ATUARUK Nukissiorfiit: Fald i kogepåbud
Imermik qalatitseqqaaqqusisalerneq 2013-imi oktobarip ulluisa aappaanni atulersinneqartoq maanna atorunnaasinneqarpoq, imermik misissugassamik tigusinerup takutissinnaalermagu nunaqarfiup imeqarfiani tunillannartuiaanerup kingorna pitsaassuseq ajunngitsoq, Namminersorlutik Oqartussat taama ilisimatitsipput.
Qassiarsummi savaateqarneq inuussutissarsiutitut pingaarnerpaavoq, innuttaasullu imermik qalatitseqqaartarneq sungiusimagaat Nukassi Frederiksen oqarpoq.
- Tassa imatorujussuaq uanga sunniuteqartutut oqaatigisinnaanngilara. Tassa maani nunaqarfimmi taanna sungiusimaannaratsigu. Nammineq imigassaq puilasuninngaanniit piortortarlugu, pingaartumik upernaleraangat nuna kuugutileraangat. Tassa uumasuuteqarfimmiikkatta taanna sungiusimaannarparput, kisianni taanna imermik qalatsitseqqaartarneq atorunnaarmat nuannerpoq pitsaallunilu, Frederik Nukassi Frederiksen taama oqarpoq.
AAMMA ATUARUK Qassiarsuk Avatangiisinik Pinngortitamillu Mianerinninneq pillugu nersornaammik tunineqarpoq
Nukissiorfiit tusagassiorfinnut nalunaaruteqarlutik KNR-imut ilisimatitsipput nunaqarfimmi erngup pitsaassusiata akuerineqarsinnaasunngornera Qassiarsummi nutaamik imeqarfeqalerneranik pissuteqartoq.
- Nuannaarutigaarput Qassiarsunni misilittakkagut nunami maani nunaqarfinnut allanut ingerlateqqissinnaagatsigit, kisianni siullermik nuannaarutigaarput Qassiarsunni sullittakkatta maannakkut imermik imerneqartussamik ajornannginnerusumik pissarsisinnaalernerat, Nukissiorfiit nunap immikkoortuani pisortaa Lars Hoffmeyer, Qaqortumi, oqarpoq.
Nukissiorfinnit aamma nassuiaatigineqarpoq Qassiarsunni imeqarfik nutaaq imeqarfinni assigiiaartunit, Nukissiorfiit ukiuni aggersuni tulleriaarlugit sanasartagassaanni, siullersaasoq.
Qassiarsunni misilittakkat nunatsinni nunaqarfinnut allanut ingerlateqqinneqassapput, ilimagineqarporlu imeqarfiit assigiiaat nutaat nunaqarfinni amerlasuuni erngup imerneqartussap pitsaassusianik annertusititsiumaartut, Nukissiorfiit taama allapput.
