Nunatsinni nunaqarfinni arfinilinni imermik kuuffimmit qalatitseqqaaqqusisoqaraluartoq erngup suli bakteeriaqarneranik toqqaannartumik takussutissiinngilaq.
Atortorissaarutinilli assigiinngitsunit bakteriat aallaaveqarsinnaasorineqarput.
- Imermik saliivik misiliinermi pissusissamisuunngitsumik ingerlasimasinnaavoq, taamaalillunilu misiliutinik tigusinermi qaangiisoqartarluni, Nukissiorfinni imermik pilersuissutilerinermik siunnersorti, Mathias Eriksen oqarpoq.
Taamaammat imeqarfimmi bakteerianik nassaarneq silameersuunani aasaaneranilu silap kianneranit aallaaveqanngitsoq, Mathias Eriksenip oqaatigaa.
- Imeq tasermeersoq aasaaneranit sunnerneqanngilaq.
Nunaqarfinni Tasiusaq Kujallermi, Aammassivimmi, Eqalugaarsunni, Qassiarsummi, Ikamiuni, Sarfannguani, Qaasuitsumi Nuussuarmi Niaqornaarsummilu innuttaasut sapaatip akunnerata aallartinnerani imermik qalatitseqqaartaqquneqarput.
Sumiiffiit assigiinngitsut ataatsikkut eqqorneqaraluartut pitsaanerusumik ingerllutik Nukissiorfiit oqaatigaat.
Ukioq manna oktobari naasoq katillugu ulluni 1900-ini qalatitseqqaaqqusisoqareersimavoq.
2015-imilu piffissami tassani aamma ulluni 2400-ini qalatitseqqaaqqusisoqareersimalluni.
Imermillu qalatitseqqaarnissamik kaammattuuteqarnerit ukioq manna 500-inik ikinnerupput.
- Nukissiorfiit isumalluutit pisariaqartut suliniutigilluarpaat, atortunillu pitsanngorsaaniartuarlutik, taamaammat imermik qalatitseqqaaqqusisarnerit ikilisinnissaat anguniarparput.
Kisitsisillu ikilineri tamaanna killeqanngilaq, qalatitseqqaaqqusisarnerimmi ikinneruleqqinnissaat suli sulissutigalugu Nukissiorfinniit Mathias Eriksenip oqaatigaa.
- Suliniut tamanna suliniuteqarfigisorujussuuarput, isumalluutinillu pisariaqartinneqartunik qalatitseqqaaqqusisarnernik ikilisitsisinnaasunik pilersuilluta, Mathias Eriksen oqarpoq
Sarfannguani Ikamiuni imermik maannamut qalatitseqqaaqqusisoqarunnaareerpoq.