Qassiarsuk Avatangiisinik Pinngortitamillu Mianerinninneq pillugu nersornaammik tunineqarpoq
Qassiarsummi pinngortitaq avatangiisillu paarilluarneqarput savaateqarneq, nunaateqarneq takornariaqarnerlu ingerlanneqaraluartut. Qassiarsummi nunaqqatigiit pinngortitap tunniussinnaasai malinnaaffigilluarpaat uumasut pinngortitarlu artukkerumanagit, taamaalillutik inuuniuteqarnertik paarilluarlugu, Namminesorlutik Oqartussat nersornaasiinermi taama tunngavilersuuteqarpoq.
Inuit, suliffeqarfiit kattuffiilluunniit tamatsinnik pinngortitamik avatangiisimillu mianerin-ninnissatsinnik ilisimaarinnilersitsisut imaluunniit Kalaallit Nunaanni suliniuteqarnermikkut avatangiisitsinnik pitsanngorsaataasumik iliuuseqarsimasut nersorniarlugit nersornaat tunniunneqartarpoq.
Nunaqarfinnguaq tamanut tikikkuminartuuvoq najoruminartuullunilu, tamarmillu iluaqutissaannik nuannaarutissaannillu pinngortitaq saligaatsuutinneqarpoq. Qassiarsummilu nunaqqatigiit nunaqarfimminnik paarsilluarnertik tulluusimaarutissaraat nersorneqaatigalugulu, Qassiarsuup nersornaaserneqarneranut atatillugu aamma taamatut allaaserineqarpoq.