Qaqugukkut kalaaliusoqartarpa?
Qaqugukkut kalaaliusoqartarpa? Qugukkut qallunaajusoqartarpa? Kalaallit Danmarkimi najugallit eqqoqqissaartumik kisitsisaatigineqalersinnaanngillat danskit kalaallillu assigiimmik pas-eqartillugit aammalumi inuk inuiaqatigiinnut sorlernut ilaanersoq qanoq misigissuseqarneq aallaavigalugu aalajangiunneqartarpoq.
Sapaatip akunnerani uani folketingimi Atlantikup avannaani Suleqatigiiffiup kalaallit Danmarkimut nunassissimasut pillugit misissuisitsimaneri marluk saqqummiunneqarput. Tassani kalaaleqatitta Danmarkimut nuussimasut amerlassusaat 18.500-nut naatsorsorneqarpoq. Kalaallit Nunaannut taakku utertitsissinnaagaluaraanni isumalluutissatsiarsuit, inuit ilaat taama eqqarsassagaluarput. Kisiannili kisitsisit amerlanaagaasinnaapput.
Kisitsisinulli ukununnga ilanngunneqarsimapput inuit Kalaallit Nunaanni inunngorsimasut tamarmik, imaluunniit angajoqqaavi aataakkuiluunniit aamma ilanngullugit taamaallaat meeqqat Danmarkimi inunngorsimasunik angajoqqaallit pinnagit.
Misissuisimanermi uani kinguaarit siulliit Danmarkimut nuussimasut kisiisa eqqarsaatigingaanni kisitsisit 5.100-inut naatsorsorneqarput. Tassani aamma Kalaallit Nunaanni inunngorsimasut tamarmik pineqarput, danskiusunik angajoqqaallit minillugit.
Aammattaaq Kalaallit Illuutaasa ukiut tamaasa kalaallit danmarkimi najugaqartut amerlassusaat misissortarpaat. Naatsorsuinermi tassani inuit Kalaallit Nunaanni tamarmik inunngorsimasut eqqarsaatigineqartarput. 2011-mi kisitsisit 14.700-ngajannut naatsorsorneqarput. Ukiuni kingullerni kisitsisit amerliartuaarsimapput, 2007-miilli 1.200-nik amerleriarsimallutik.
Allattorsimaffimmi aamma takuneqarsinnaavoq, Danmarkimi kommunit 100-ngajaasut tamarmik kalaallinik imaluunnit Kalaallit Nunaanni inunngorsimasunik innuttaqartut. Læsømi marluupput, Københavnimilu amerlanerpaajullutik 6.000-ngajaallutik.
