Qaqugu akia eqqartussagassiuk?
![](/sites/default/files/styles/image_934x467/public/article_images/dash_7_taet_630_3.jpg?itok=gCwMmtUx)
- Oqaaseqartut amerlanerit oqaaseqarput, Qaqortoq mittarfittaartariaqartoq, Kommune Kujallermi borgmesteri Simon Simonsen oqarpoq.
Qaqortumi inuusutissarsiorneq pillugu oqallittarfiup siulittaasuata Jim Riisip, qatsulluinnarpaa Qaqortumi mittarfiliortoqarnissaa pillugu ajoqutaasinnaasut pineqarpallaarnerat. Taanna isumaqarpuq Narsarsuarmiit Narsarsuarmullu angallanniarnerup akisunerujussua.
- Qaqortumi mittarfiliortoqassagaluarpat, mittarfiliornissamik akerliusunit oqariartuutigineqarpoq ukiukkut aputaajaasarnissaq akisuallaassasoq. Killormullu, aamma oqariartuutigineqarluni, sooq Qaqortumiit Narsarsuarmut aqqusinniortoqarsinnaanngila? Oqaatsit taakku, imminut akerleriilluinnarput. Tassami Qaqortumiit Narsarsuup tungaanut aqquserngiortoqassagaluarpat, suli aputaajaaneq annertunerujussuaq ingerlanneqassaaq. Taamatullu aamma oqaatiginiarneqarpoq, mittarfissap ungasinneratigut taxanut aningaasartuutigineqartussat amerlassasut. Uanili, eqqaanneqanngilaq, Qaqortumiit Narsarsuarmut helikopteriinnarmut siumut utimullu 2000 koruuninik akiliisartugut, Jim Riis oqarpoq.
IA-kkut isumaqarput, mittarfiliortoqarsinnaannissaa pillugu suli misissuisoqaqqittariaqartoq. Kisiat Siumukkut Demokraatillu isumaqarlutik mittarfiliortoqartariaqartoq.
- Misissueqqissaarnerit ingerlanneqareerpata, qularutiginngilara Inatsisartut tunngavissaqarluarlutik isummerumaartut, Kommune Kujallermi borgmesteri Simon Simonsen oqarpoq.