Qaqqasiortartoq tusaamasaq tunumi innaaqqissukkut qaqisoq
“Iigaq majuarfigineqanngisaannartoq. Sumiiffillu silap pissusianik ilisimatusarfigineqarpallaarsimanngitsoq.”
Isiginnaagassiap piviusuinnik tunngavillip, Disney+imi saqqummersinneqaqqammerluinnartup Tunumi qaqqaq Immikkeertaajik taama nassuiaatigaa.
Isiginnaagassiami tassani qaqqasiortartup, Alex Honnoldip kalaallit pinngortitaani misiliinera isiginnaarneqarsinnaavoq.
Alex Honnold immaqa tusarsimassavat. Taanna qularnaallisaanermut atortorissaarutinik soorlu allunaasamik, qularnaallisaanermi qitequtaasamik naatittartumilluunniit atortoqarani majuartartuuvoq.
Amerikamiup, qaqqasiortartup, 38-nik ukiullip Yosemite National Parkimi innaq qaarsuusoq El Capitan qularnaallisaanermut atortorissaaruteqarani 2017-imi qaqigamiuk tusaamaneqarnerulerpoq. Qaqinera piviusuinnik tunngaviliuttut “Free Solo”-mik atserlugu saqqummersinneqarpoq, tamannalu kingorna Oscarinnassutigineqarluni.
Alex Honnold maanna isiginnaarneqarsinnaaleqqippoq. Isiginnaagassiami Arctic Ascent with Alex Honnold”-imi qaqqaq Immikkeertaajik qaqiniarsaraa.
Qaqqaq Nertiit Inaata avannaata kangiani kangerlummi iigartartumik sermeqartup ungasinngisaanniippoq. Alex Honnoldillu Immikkeertaajik El Capitanimit 1000 fodip missaanik tassa 300 meterit sinnilaarlugit qutsinnerusoq isiginnaagassiami oqaatigaa.
Air Greenland tusagassiuutinut nalunaarummi allappoq.
Nannut silarlunneralu
Air Greenlandili sooq akuua?
Timmisartuutileqatigiiffik Alex Honnoldip suleqataanit qulimiguulimmik attartornissaq pillugu attavigineqarpoq. Qaqqasiortartoq, National Geopgraphicimit filmiliortartut, atortorissaarutit taqussallu Nertiit Inaata eqqaanut assartorneqartussaapput.
Kiisalu pilersuutit eqimattanut 2022-mi juulimit aggustimut sumiiffimmiittunut assartorneqassallutik.
Nunatsinnili silap allanngoriataartarnera suliassanut arlaleriarluni unammillernartoqartitsivoq.
- Silamillu peqquteqarluni ullut susinnaanngiffiit Alex Hannoldimut filmiliortunullu ilungersunarnerpaasarput. Qulimiguulimmi takkusinnaanngikkaangat taakku nunatta kangiani inuilaarsuarmi ulorianartoqarsinnaasumi, nanoqarfiusumilu, kisimiivittarput.
- Paasitinneqarpugullu nannut arlallit siumorneqarsimasut. Aammalumi taqussat nungukkaangata nerisassaarutivinneq misigisarpaat, Air Greenlandimi Sales Account Manageriusoq, Daniel Motzfeldt tusagassiuutinut nalunaarummi oqaluttuarpoq.
Tamarmili iluatsilluarpoq. Alex Honnoldip Imikkeertaajik qaqivissimaneraa takuniarukku isiginnaarusukkukku utaqqilaartariaqassaatit. Isiginnaagassiaq “Arctic Ascent with Alex Honnold” Disney+-ikkut nunatsinnit suli isiginnaarneqarsinnaanngilaq.
