VIDEO Qaqortumik nipilersornermik pikkorissartitsineq iluatsilluartoq
Campus Kujalleq pingasunngornermi ualikkut iserlugu illarpalaaq tusarsaavoq. Nipilersornermik pikkorissarneq naammassiartuaarpoq.
- Meeqqat pikkorissupilussuupput amerlasoorujussuit nipilersullaqqereerput, taava aamma ilai ilikkajaqaat, Nive Nielsen KNR-imut oqarpoq.
- Isumaqarpunga inuusuttut uku tunniusimalluarlutik pimoorussillutillu pikkorissartut. Amerlanersaat angerlarlutik sungiusartarput. Oqarsinnaavunga misigisaq nuannersuusoq, Simon Lynge KNR-imut oqarpoq.
Aamma atuaruk VIDEO Qaqortumi nipilersornermik pikkorissartut aallartipput
- Nuannersorujussuuvoq. Nipit qanoq ataqatigiissaarneqarsinnaaneri paasitikkaangatsigit aammalu nipilersugaq qanoq ataqatigiissarneqarsinnaanersoq, pissarsinarpoq nuannerlunilu, Aviaja Lumholdt KNR-imut oqarpoq.
- Meeqqat nuannisarpasipput, pissarsiaqarnalaaqaaq. Pikkorerrapput, ilai malunnarpoq soorlu aamma killertik qaangeqattaaraat, imminut unammillertutut illutik. Taavalu aallaqqaammut ittooriarlutik ittoorunnaariartortut malunnarpoq, Pilutannguaq Løvstrøm Hammeken KNR-imut oqarpoq.
Peqataalluni aamma pissarsinarpoq.
- Nuannerpoq ajunngilaq, ilikkarnaqaaq. Guitarerlungalu pattagiarpunga, Helga Kielsen Olsen KNR-imut oqarpoq.
Aamma atuaruk Inuusuttunut nipilersornermik pikkorissartitsilerput
Nunattalu sinnerani pikkorissaasoqarnissaa tulluaraluarpoq.
- Soorlu amigaatigineqarsimavoq, tigulluarneqarpoq, assut malunnarpoq, Pilutannguaq Løvstrøm Hammeken oqarpoq.
- Sinerissami aamma pisariaqartitsisoqarsinnaasoq takorloorsinnaavara, musikskoleqarnissaq, tikillugit nipilersorusussusillit amerlaqaat, Nive Nielsen oqarpoq.