VIDEO Qaqortumi nipilersornermik pikkorissartut aallartipput
Campus Kujalleq saneqqullugu erinarsorpalaaq tusarsaavoq. Pikkorissunik sungiusaasoqarlutik aallartipput.
- Uku pikkorissaasut pikkorippasipasipput nipilersullaqqippasipput, Kaya Kielsen-Davidsen KNR-imut oqarpoq.
Pikkorissaasullu isumalluarput.
- Naatsorsuutigaara nuannisarluarnissarput immitsinnut ammanissarput kiisalu nipilersornermik pilersitsinissarput, nutaanillu ilikkagaqarnissarput, Martin Rasmussen musikkonservatoriemeersoq KNR-imut oqarpoq.
Aamma atuaruk Inuusuttunut nipilersornermik pikkorissartitsilerput
- Nipilersorneq nuannarigakku peqataarusukkama allamik aamma ilikkagaqarusukkama, Kaya guitarertartoq erinarsortartorlu oqarpoq.
Inuusuttut 36-it peqataassallutik nalunaarnikut amerlagisassaanngitsut ullormi siullermi takkupput.
- Neriuutigaarput ullup ingerlanerani takkukkiartuaassasut. Maannamut ajunngitsumik ingerlavoq. Isumaqarpungalu tamatta pissarsiaqassalluta, Martin Rasmussen oqarpoq.
Aasaanerani nipilersornermik pikkorissartitsinermik aaqqissuisut siunissamut aamma neriuuteqarput.
- Una ”Nipitu” musikskole projektini siulliuvoq, neriuppugullu siunissami assingusunik suliaqarsinnaassalluta, Jakob Søvndahl Skovaa P.I.P-meersoq KNR-imut oqarpoq.